कोरोना फैलिन नदिन चीनस्थित नेपाली नियोगहरूको हटलाइन  

लक्ष्मी लम्साल

बेइजिङ — चीनमा फैलिएको कोरोना भाइरसको संक्रमणप्रति सचेत रहन चेतावनी जारी गर्दै चीनस्थित नेपाली निकायहरूले चीनका विभिन्न स्थानहरूमा आकस्मिक सेवाका लागि हटलाइन सेवाको व्यवस्था गरेका छन् ।

बेइजिङस्थित नेपाली दूतावासले बिहीबार एउटा सूचना जारी गर्दै बेइजिङ, क्वाङ्चौ, ल्हासा, हङकङ र शाङ्हाईमा आपतकालीन् सहयोगका लागि हटलाइनको व्यवस्था गरिएको सूचित गरेको हो।


दूतावासद्वारा जारी वक्तव्यमा कोरोना भाइरस संक्रमित बिरामीहरूको सम्पर्कमा नआउन, सकेसम्म भाइरस प्रभावित क्षेत्रको यात्रा नगर्न तथा जीवित वा मृत जनावर र खासगरी नपकाएको मासुको सम्पर्कबाट टाढै रहन सचेत गराइएको छ ।


यस्तै साबुनपानीले बारम्बार हात धुन वा साबुनपानी उपलब्ध नभएको अवस्थामा अल्कोहलयुक्त स्यानिटाइजरको प्रयोग गर्न तथा चीन सरकारको स्वास्थ्य मन्त्रालयद्वारा कोरोना भाइरस संक्रमणका सम्बन्धमा जारी हुने अद्यावधिक जानकारी लिइरहन र सो बमोजिम सेचतना अपनाउन पनि दूतावासले जारी गरेको विज्ञप्तिमा उल्लेख छ।


आपतकालीन् सहयोगका लागि चीनका विभिन्न निकायहरूमा सम्पर्क राख्न पनि दूतावासले अपील गरेको छ। हटलाइन खोलिएका निकायहरूमा बेइजिङस्थित नेपाली राजदूतावास, क्वाङ्चौस्थित नेपाली महावाणिज्य दूतावास, ल्हासास्थित नेपाली महावाणिज्य दूतावास, हङकङस्थित नेपाली महावाणिज्य दूतावास र शाङ्हाईस्थित अवैतनिक नेपाली वाणिज्य दूतावासका हटलाइन नम्बर छन् र सम्बन्धित हटलाइनमा सहयोगी कर्मचारीको पनि व्यवस्था गरिएको छ।


कोरोनाका कारण नेपाली युवाको शव अलपत्र

चीनमा फैलिएको कोरोना भाइरसका कारण एक मृत नेपालीको शव नेपाल फर्काउन समस्या भएको छ। विगत एक दशकदेखि चीनमा कार्यरत दोलखाका करिब ४० वर्षीय पुस्कर खड्काको गत आइतबार आफू बसेकै होटलमा निधन भएको थियो । कोरोना भाइरसको केन्द्र मानिएको हुपै प्रान्तको वुहानस्थित एउटा इण्डियन मार्का नामक भारतीय रेस्टुरेन्टमा उनी कार्यरत थिए। अस्पतालको प्रारम्भिक प्रतिवेदन अनुसार खड्काको कोरोना भाइरसका कारण नभएर अन्य कारणले नै मृत्यु भएको हो।


हाल सुचौमा कार्यरत मृतकका आफन्त धनबहादुर कार्कीका अनुसार खड्का विगत एक दशकदेखि चीनका विभिन्न भान्छाघरमा ‘सेफ’सम्बन्धी काम गर्दै आएका थिए । दोलखा काटाकुटी पुर्ख्यौली घर भएका खड्काकी आमा, श्रीमती र छोरा सहितको परिवार हाल भक्तपुरको ठिमीमा रहँदै आएको छ ।


भारतीय कम्पनीले ड्युटी बाहिरको घटना भएकाले क्षतिपूर्ति नबेहोर्ने बताएको छ । मृतकको शव नेपाल लैजान आवश्यक ठूलो परिमाणको रकम जुटाउनका लागि नेपालस्थित जिम्मेवार निकाय र बेइजिङस्थित नेपाली दूतावासमार्फत् पहल भइरहेको पनि कार्कीले जानकारी दिए । चिनियाँ नयाँ वर्ष अर्थात् वसन्त चाड सकिएपछि शव नेपाल फर्काउने प्रक्रिया अघि बढ्नसक्नेछ । शुक्रबारदेखि सुरू हुने चिनियाँ नयाँ वर्षको विदा एक सातापछि सकिनेछ ।


चिनियाँ वसन्त चाडको लामो बिदामा चिनियाँहरूको बाक्लो ओहरदोहोर हुने भएकाले कोरोना भाइरस फैलिने आशंकामा वुहानको सरकारले बिहीबारदेखि लागू हुने गरी त्यहाँका सार्वजनिक यातायातहरू अस्थायी रूपमा बन्दको घोषणा गरेको छ । स्थानीय बस, लामो दूरीका बस तथा सबवे लगायत बिहीबार बिहान १० बजेदेखि बन्द गरिएका छन् ।


वुहानबाट चल्ने सबै उडानहरू तथा रेल तालिका रद्ध गरिएको छ। वुहानका स्थानीय वासिन्दालाई अत्यावश्यक काम बाहेक बाहिर ननिस्कन चेतावनी जारी गरिएको छ। प्रकाशित : माघ ९, २०७६ १८:४६

प्रतिक्रिया
पठाउनुहोस्
ADVERTISEMENT

बाल यौन दुराचार : क्यानेडियन डलग्लिसको कसुर सदर 

सजायमा उदारता 
जनकराज सापकोटा

काठमाडौँ — बाल यौन दुराचारको मुद्दामा थुनामा परेका क्यानेडियन नागरिक पिटर डलग्लिसको सजाय उच्च अदालत पाटनले एक वर्ष घटाएको छ । यसअघि जिल्ला अदालत काभ्रेले गरेको नौ बर्षको कैद सजायको फैसलालाई एक बर्ष घटाएर उच्चले आठ बर्ष कायम गरेको छ । 

उच्च अदालतको फैसलाले पिटरको बाल यौन दुराचारमा संग्लनता रहेको तथ्यलाई थप स्थापित गरेको छ । न्यायधीशद्वय रामप्रसाद ओली र मीना गौतम सेढाईंको संयुक्त इजलासले यस्तो फैसला गरेको हो । फैसलाको पूर्ण पाठ भने तयार भएको छैन ।

नेपाल प्रहरीको केन्द्रीय अनुसन्धान ब्युरोका डिएसी कविद कट्वाल नेतृत्वको टिमले २४ चैत २०७४ मा काभ्रेको मण्डन देउपुर नगरपालिका–१ स्थित घरबाट पिटरलाई दुई बालकसहित पक्राउ गरेर मुद्दा चलाएको थियो । कोठामा भेटिएका दुई बालकले प्रहरी र अदालतमा आफूहरुलाई पिटरले यौन दुराचार गरेको बयान दिएका थिए । उक्त मुद्दामा २३ असारमा जिल्ला अदालत काभ्रेले अभियुक्तलाई नौ बर्ष कैद सजाय फैसला गरेको थियो । फैसलाविरुद्ध पिटर उच्च अदालत गएका थिए ।

बाल यौन दुराचारको आरोपमा नेपालमा पक्राउ परेका विदेशीहरुमध्ये पिटर ‘हाईप्रोफाईल’ मानिन्छन् । त्यसैले पनि दिल्लीस्थित क्यानेडियन उच्चायुक्त कार्यालयले पनि पिटरको मुद्दामा कुटनीतिक चासो देखाएको थियो । उच्चायुक्तको कार्यालयले परराष्ट्र मन्त्रालयलाई कुटनीतिक नोट नै लेखेर ‘आफ्ना नागरिक पिटरका हकमा बाँकी कैद क्यानडामै भुक्तान गर्ने गरि बुझाउन’ आग्रह गरेको थियो । त्यसो त २३ असारमा जिल्ला अदालत काभ्रेमा पिटरको मुद्दाको अन्तिम फैसला हुँदाको बखत उच्चायुक्त कार्यलयका मिनिस्टर काउन्सेलर अमान्डा स्ट्रोहन र महावाणिज्यदुत भेरोनिक देशहाईस स्वयम उपस्थित भएका थिए ।

उनीहरुलाई ‘इजालसमा उपस्थित हुने ब्यवस्था मिलाइदिन’ दिल्लीस्थित क्यानाडेली राजदूतावासले १८ असार २०७६ मा परराष्ट्र मन्त्रालयलाई कुटनीतिक नोट नै लेखेको थियो । सोही अनुरोधलाई सदर गर्दै १९ असार २०७६ मा परराष्ट्र मन्त्रालयले कानून न्याय तथा संसदीय मामिला मन्त्रालयलाई पत्राचार गरेको थियो । पत्राचारको यही श्रृंखलापछि दुई उच्च कुटनीतिक अधिकारीहरुले इजलासमा उपस्थिती सम्भव भएको थियो ।

स्ट्रिट किड्स ईन्टरनेशनल नामक संस्था खोलेर युद्धपीडित र सडक बालबालिकाको हक अधिकारको क्षेत्रमा काम गर्दै आएका डलग्लिसले लामो समय संयुक्त राष्ट्रसंघ अर्न्तगत रहेर काम गरेका थिए । सन् २०१५ अघिसम्म पिटर युएन ह्याबिट्याटको अफगानिस्तान प्रतिनिधिको रुपमा काम गर्दै आएका थिए । सन् २०१६ मा क्यानडा सरकारले नागरिकलाई प्रदान गर्ने सर्वोच्च नागरिक सम्मान पाएका र तीनवटा अनररी डक्टरेटको उपाधि पाएका उनी सन् १९९८ मा संसारका दस प्रतिभाशाली युवाको रुपमा जुनियर च्याम्बर इन्टरनेसनलको छनौटमा परेका थिए ।

प्रकाशित : माघ ९, २०७६ १८:४३
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×