काठमाडौँ — नेपाल राष्ट्र बैंकका प्रवक्ता गुरुप्रसाद पौडेलले अर्थतन्त्रको पुनरुत्थानका लागि कर्जा प्रवाह बढाउनु मात्र पर्याप्त नभई लगानीकर्तामा विश्वास र सुरक्षाको अनुभूति आवश्यक रहेको बताएका छन्।

कान्तिपुर कन्क्लेभ–२०२६ अन्तर्गत 'अर्थतन्त्रको पुनरुत्थान, विश्वासको पुनःस्थापना' विषयक सत्रमा बोल्दै पौडेलले राष्ट्र बैंक उपयुक्त लगानी वातावरण बन्ने पर्खाइमा रहेको स्पष्ट पारे । उनका अनुसार हाल कर्जाको माग अपेक्षाअनुसार बढ्न सकेको छैन । 'केही समयअघि प्रकाशित निजी संस्थाकाे सर्वेक्षणले करिब ७० प्रतिशत लगानीकर्ता अब के गर्ने भनेर हेरेर बसेको र ७ प्रतिशतले अब लगानी नगर्ने बताएकाे देखेका थिए,' उनले भने, 'कर्जाको माग नबढ्नु लगानीकर्तामा आत्मविश्वास र सुरक्षाको अनुभूति नहुनु तथा उत्पादनबाट प्रतिफल आउँदैन भन्ने धारणाले  हुन सक्छ।'