काठमाडौँ — निर्वाचनका लागि लिइएका म्यादी प्रहरीलाई उद्यम र रोजगार तालिम दिइने भएको छ । त्यस्तै म्यादी प्रहरीलाई सरकारले सञ्चित सुरक्षा बलको रूपमा उपयोग गर्ने व्यवस्था गर्ने भएको छ ।
सरकारको आगामी आर्थिक वर्षको बजेट संघीय संसद्मा प्रस्तुत गर्दै अर्थमन्त्री जनार्दन शर्माले म्यादी प्रहरीका लागि सरकारले योजना ल्याएको जानकारी दिएका हुन् ।
'म्यादी प्रहरीको रूपमा राष्ट्र सेवामा समर्पित युवाहरूलाई लक्षित गरी उद्यमशिलता र रोजगार केन्द्रित कार्यक्रम सञ्चालन गरिनेछ । उनीहरूको रुचीको विषयमा तालिम प्रदान गरी कृषि, वनजन्य र अन्य उद्यममा संलग्न हुने अवसर उपलब्ध गराइनेछ,' म्यादी प्रहरीबारे बजेटमा राखिएका व्यवस्थामा मन्त्री शर्माले भने, 'म्यादी प्रहरीलाई सञ्चित सुरक्षा बलको रूपमा उपयोग गर्न आवश्यक व्यवस्था मिलाइनेछ ।'
सरकारले स्थानीय तह निर्वाचनका लागि करिब एक लाख युवाहरूलाई म्यादी प्रहरीमा भर्ना लिएको थियो ।
