मकवानपुर — सत्ता गठबन्धन दलहरूले मकवानपुर जिल्लाका स्थानीय तहको प्रमुख तथा उपप्रमुखको भागबण्डा टुंग्याएका छन् ।

नेपाली कांग्रेस वाग्मती प्रदेश सभापति इन्द्रबहादुर बानियाँका अनुसार काठमाडौंमा बसेको गठबन्धन बैठकले मकवानपुरमा ५ वटा स्थानीय तहको प्रमुखमा कांग्रेस, ३ वटामा माओवादी केन्द्र र २ वटा नेकपा (एकीकृत समावजादी)लाई दिइने निर्णय गरेको छ ।

कांग्रेसले वकैया, मकवानपुरगढी, मनहरी, राक्सिराङ र कैलाश गाउँपालिका प्रमुख प्राप्त गरेको छ । २०७४ को स्थानीय तह निर्वाचनमा कांग्रेस वकैया र राक्सिराङमा विजयी भएको थियो ।

यस्तै माओवादी केन्द्रले थाहा नगरपालिका, वाग्मती र भीमफेदी गाउँपालिका प्रमुखमा उम्मेदवारी दिने भएको छ । २०७४ सालको स्थानीय तह निर्वाचनमा माओवादीले थाहा र वाग्मतीमा जितेको थियो ।