हेटौंडा — नियमित विद्युत्को उपलब्धता नहुँदा हेटौंडामा कोरोना परीक्षण प्रभावित भएको छ । हेटौंडा–१० स्थित किटजन्य रोग अनुसन्धान तथा तालिम केन्द्रमा नियमित विद्युत् उपलब्ध नहुँदा आइतबार कोरोना परीक्षण नै हुन सकेन ।

‘दिनभर विद्युत् आउनेजाने भइरह्यो । जसले गर्दा हामीले परीक्षण गर्न सकेनौं,’ सामाजिक विकास मन्त्रालयका सूचना अधिकारी तथा चिकित्सा महाशाखा प्रमुख डा. पुरुषोत्तम सेढाईंका अनुसार ल्याबमा रहेको जेनेरेटरले पनि काम नगर्दा समस्या भएको हो । ‘विद्युत् नभएको समयमा जेनेरेटरबाट काम गरिरहेका थियौं । आइतबार त्यसमा पनि समस्या सिर्जना भयो । जसले गर्दा कोरोनाको रिपोर्ट हामीले समयमा उपलब्ध गराउन सकेनौं,’ डा. सेढाईंले भने । उनका अनुसार आइतबार ४६ वटा स्वाब कोरोना परीक्षणका लागि पीसीआर मेसिनमा राखिएको थियो ।

आइतबारको स्वाबको परीक्षण सोमबार बिहानैबाट गर्ने तयारी भइरहेको छ । ‘सोमबार जसरी पनि आइतबारको रिपोर्ट निकालेर थप स्वाबको परीक्षण गर्नुपर्नेछ,’ उनले थपे । पीसीआर मेसिनमा एकपटकमा ६५ वटा स्वाबको परीक्षण गर्न सकिन्छ । हेटौंडामा संघीय सरकारको सहयोगमा पीसीआर ल्याबको स्थापना गरिएको थियो ।