पर्सा — कुनै समय वीरगन्ज सुन्दा फोहोर र दुर्गन्धित सहरको झल्को आउँथ्यो । अनि दिक्दार मानेर भन्थे ‘ओहो वीरगन्ज’ । तर अहिले स्थिति बदलिएको छ । केही वर्षको अन्तराल पछि वीरगन्ज आउनेहरूको प्रतिक्रिया हुन्छ ‘आहा वीरगन्ज’ । 

अब महानगरको मुख्य सडक छेउ दिनभरि फोहोर थुप्रो देखिँदैन । मुख्य सडक छेउका व्यापारी र निजी प्रतिष्ठानहरूले आफ्नो पसल तथा कार्यालयबाट निस्कने कागजपत्रको फोहोर अधिकारले फाल्दैनन् । कारण हो जरिवानामा पर्ने डर । वीरगन्ज महानगरपालिकाको कार्यालयले यसरी जानाजान फोहोर गर्नेहरूलाई जरिवाना गर्न थालेपछि फोहोर गर्नेहरू हच्किएका हुन् । 

यसरी सडक फोहोर पार्ने प्रवृत्ति निरुत्साहित भएपछि महानगरको मुख्य र भित्री सडकहरू पनि तुलनात्मक रूपमा सफा भएको छ । पहिले मुस्किलले बिहान फोहोर बोक्न आउने महानगरको ट्याक्टर अहिले दैनिक बिहान, दिउँसो र बेलुका गरी ३ पटकसम्म आउने गरेको छ । महानगरका कुचीकारहरू पनि तीन पटकसम्म सडक बढार्छन् । रातिसम्म संकलन हुने फोहोर राति नै सडकबाट हटाइन्छ । अब यहाँ आउने पाहुनालाई वीरगन्जको फोहोर देखेर नाक खुम्च्याउने अवस्थाको अन्त्य भएको छ । 

वीरगन्ज महानगरपालिका कार्यालय अन्तर्गत १९ जना सरसफाइकर्मी ठूला नाला तथा नगर क्षेत्रभित्रको सफाइमा खटिएका छन् । ठेकेदार एनके इन्टरेनसनलको तर्फबाट थप ४ सय १० जना सवारीचालक तथा कुचिकार महानगरको १ देखि ३२ सम्म खटिएका छन् । ४९ ट्याक्टर, ४ जेसिबी, १ ब्रुमर, १ ब्याहहोलोडर, २/२ वटा जेटिङ र सक्सन मेसिन दैनिक महानगरबाट संकलन हुने फोहोर संकलनमा परिचालन हुन्छन् । दैनिक २ पटक हरेक क्षेत्रमा सफाइ गरिन्छ । मन्दिर एवम् व्यस्त बजार क्षेत्रमा दैनिक ३ पटक सफाइ गरिन्छ ।  महानगरका सडकमा रातमा पनि बढार्ने, फोहोर संकलन गर्ने र उठाउने काम गरिन्छ । 

वीरगन्ज महानगरपालिका कार्यालयको सरसफाइ महशाखा प्रमुख सर्फुदिन मियाँले २०७९ पुस १७ बाट सडकमा जथाभावी फोहोर फाल्नेलाई जरिवाना गर्ने काम सुरु गरिएको बताए । यस क्रममा १ हजार ५ सय बढी व्यक्ति र संस्थालाई जरिवाना गर्दा करिब ४५ लाख रुपैयाँ राजश्व संकलन भएको छ । यसरी फोहोर गर्नेलाई दण्डित गर्दा जथाभावी फोहोर फाल्ने प्रवृत्तिमा व्यापक कमी आएको र बर्सेनि जरिवाना हुनेहरूको संख्या घट्दो क्रममा रहेको उनले बताए । 

वीरगन्जको नगवा–मुसहर्वा क्षेत्रमा रहेको ल्यान्डफिल साइटको क्षमता २० बर्षको रहेको छ । ८ वर्षदेखि सञ्चालनमा रहेको छ । ल्यान्डफिल साइट सञ्चालक ठेकेदार कम्पनी एनके इन्टरनेसनल कन्स्ट्रक्सन प्रालिका निर्देशक शिवजी गुप्ता हाल साइटमा नालाको माटो छाडेर दैनिक ६५ देखि ७५ टनसम्म फोहोर संकलन हुने गरेको बताउँछन् । तिनमा प्लास्टिकजन्य फोहोर, फलाम, कुहिने अन्य बस्तु समेत रहने गरेका छन् । कुहिने बस्तुबाट वार्षिक २५ देखि ४० टनसम्म कम्पोस्ट मल उत्पादन गरिन थालेको छ । किसानलाई यो मल प्रतिकिलो १ सय ४० रुपैयाँमा बिक्री गरिरहेको गुप्ता बताउँछन् ।