काठमाडौँ — मुलुकको सबैभन्दा पुरानो राजनीतिक पार्टी नेपाली कांग्रेस संसदीय दलको नेता बन्ने अवसर पाउनु नै शेरबहादुर देउवाका लागि प्रधानमन्त्री बन्ने खुड्किलो थियो । २०५१ को मध्यावधि निर्वाचनबाट चुनिएका कांग्रेसका सांसदहरूले उनलाई २०५२ मंसिर १६ मा संसदीय दलको सर्वसम्मत नेता बनाएका थिए ।

दलको नेता चुनिएको नौ महिनामा अल्पमतको एमाले सरकार ढल्यो । त्यसपछि उनले पहिलो पटक  प्रधानमन्त्री बन्ने अवसर पाएका थिए । २०५२ भदौ २५ मा प्रतिनिधिसभामा भएको अविश्वास प्रस्तावसम्बन्धी मतदानमा तत्कालीन प्रधानमन्त्री मनमोहन अधिकारी पराजित भएपछि देउवालाई प्रधानमन्त्री बन्ने अवसर प्राप्त भएको थियो । प्रतिनिधिसभामा विश्वासको मत नपाएपछि प्रधानमन्त्री मनमोहन अधिकारीले सोही दिन राजासमक्ष राजिनामा दिएका थिए । राजाले २०५२ भदौ २६ मा कांग्रेस संसदीय दलको नेताको हैसियतमा देउवालाई प्रधानमन्त्रीमा नियुक्त गरेका थिए । देउवाको राजनीतिक व्यक्तित्व बन्ने जग त्यही दिनबाट सुरु भएको थियो । 

देउवाले कांग्रेस, राष्ट्रिय प्रजातन्त्र पार्टी, नेपाल सद्भावना पार्टी र स्वतन्त्र सांसदहरूसमेतको समर्थनमा विश्वासको मत प्राप्त हुने आधार पेस गरेकाले उनलाई राजाले प्रधानमन्त्रीमा नियुक्त गरेका थिए । उनको नियुक्तिले त्यतिबेला सत्ता र शक्ति युवा पुस्तामा हस्तान्तरण भएको सर्वत्र चर्चा थियो । 

देउवा प्रधानमन्त्रीमा नियुक्त हुँदा ४९ वर्षका थिए । २०४८ मा बनेको कांग्रेस नेतृत्वको सरकारका प्रधानमन्त्री गिरिजाप्रसाद कोइरालाले देउवालाई गृहमन्त्री बनाएका थिए । सुदूरपश्चिमको ‘कमान्डर’का रूपमा चिनिएका देउवा त्यतिबेला कोइरालाका विश्वास पात्र थिए । कांग्रेसको झापामा भएको महाधिवेशनपछि कृष्णप्रसाद भट्टराईले देउवालाई पार्टीको केन्द्रीय सदस्य मनोनीत गरेका थिए । पार्टीका अन्य सिनियर नेताहरूलाई उछिनेर जसरी संसदीय दलको नेता चुनिए, त्यही बेलादेखि देउवाको राज्य सञ्चालनको भाग्य चम्केको थियो । सुदूरपश्चिम छात्रा समितिको अध्यक्ष बनेर राजनीति सुरु गरेका उनले पार्टीका अन्य सिनियर नेताहरूलाई पछि पार्दै प्रधानमन्त्री बन्ने अवसर पाएका थिए । 

साढे तीन दशकको अवधिमा देउवा  विभिन्न राजनीतिक घटनाक्रममा जोडिएर ५ पटक प्रधानमन्त्री बनिसकेका छन् । दुई पटक  पार्टी सभापति पद जितेर कांग्रेसलाई एकछत्र रूपमा सञ्चालन गर्ने अवसर पनि पाएका थिए । २०४८, ०५१, ०५६, ०६४, ०७०, ०७४ र ०७९ को निर्वाचनमा डडेल्धुराबाट लगातार चुनाव जित्दै आएका देउवा पहिलो पटक संसदीय दलको नेता हुनु नै उनका लागि पहिलो ‘टर्निङ प्वाइन्ट’ थियो । प्रधानमन्त्री बन्नु उनका लागि दोस्रो ‘टर्निङ प्वाइन्ट’ वा राज्य शक्ति आर्जन गर्ने खुड्किलो बनेको थियो । त्यसकै आधारमा देउवाले पाँचपटकसम्म राज्य सञ्चालनको जिम्मेवारी पाएका हुन् । जेनजी आन्दोलनपछि पनि उनले अहिले आठौं पटक डडेल्धुराबाटै निर्वाचन लड्ने तयारीमा नाम सिफारिस गराएका छन् ।