काठमाडौँ — कार्टुनिस्ट रवि मिश्रले एकल कार्टुन प्रदर्शनी सुरु गरेका छन् । नयाँ बानेश्वरको एनबी सेन्टरस्थित उमोजा क्याफेमा १० दिनसम्म चल्ने प्रदर्शनी बिहीबारदेखि सुरु भएको हो । ‘डिपिक्सन’ शीर्षक दिइएको प्रदर्शनीमा मिश्रका ३५ कार्टुन राखिएका छन् । 

१७ वर्षदेखि कार्टुनमार्फत राजनीतिक, सामाजिक र समसामयिक विषयमा व्यंग्य गर्दै आइरहेका मिश्रले आफ्ना पाठक/दर्शकसँग अन्तरक्रिया गर्ने उद्देश्यसहित प्रदर्शनी सुरु गरेको बताए ।

‘म मेरा कार्टुनलाई ग्यालरी र पत्रिकाबाहेकका ठाउँमा पनि पुर्‍याउन चाहन्थें । यो प्रदर्शनी त्यसैको नतिजा हो,’ उनले भने, ‘प्रदर्शनीमार्फत आफ्ना कार्टुनका पाठकसँग दोहोरो अन्तरक्रिया गर्न सक्छु । कार्टुन एकतर्फी सञ्चार मात्र होइन, संवाद पनि हो भन्ने मेरो मान्यता छ । त्यसैले प्रदर्शनीमा पाठक/दर्शकका प्रतिक्रिया, विचार, सुझाव र सन्देश सुन्ने गरी आएको छु ।’