सोल — दक्षिण कोरियाले कोरोना भाइरस(कोभिड–१९)विरुद्ध ‘युद्ध’ सुरु भएको घोषणा गरेको छ । चीनबाहिर सबैभन्दा बढी करिब ५ हजारमा कोरोना संक्रमण भएपछि दक्षिण कोरियाले कोभिड–१९ विरुद्धको लडाइँ सुरु भएको घोषणा गरेको हो ।

साथै विश्व स्वास्थ्य संगठनका महानिर्देशक टेड्रोस एडानोम गेहब्रेयससले कोभिड–१९ को प्रकोपका कारण पूरा विश्व नै नक्सारहित भएको बताएका छन् । उनले भाइरस नयाँ भए पनि उपयुक्त कदम चालेमा प्रकोपमाथि नियन्त्रण गर्न सकिने विश्वास व्यक्त गरेका छन् । यसको नियन्त्रणका लागि कुनै एउटा बाटो मात्र नभएको उल्लेख गर्दै पूरा विश्व एक ठाउँमा उभिनुपर्ने उनले बताए । 

मंगलबार बिहानसम्म विश्वका ७६ देशमा कोभिड–१९ को संक्रमण देखिएको छ । मंगलबार बिहानसम्म ९० हजार ९ सय ३३ जनामा यसको संक्रमण देखिएको छ भने ३ हजार एक सय १९ जनाको मृत्यु भइसकेको छ ।

दक्षिण कोरियामा मंगलबार बिहानसम्म ४ हजार ८ सय १२ जनामा कोभिड–१९ को संक्रमण देखिएको छ भने २८ जनाको मृत्यु भएको छ । दक्षिण कोरियामा सबैभन्दा बढी असर दक्षिणपूर्वी सहर देइगुमा देखिएको छ । 

कोरोना प्रकोप : ७६ देशमा संक्रमण, अमेरिकामा मृतकको स‌ंख्या ६ पुग्यो

दक्षिण कोरियाली राष्ट्रपति मून जेई इनले अहिले देशले कोभिड–१९ विरुद्ध युद्ध लडिरहेको बताएका छन् । कोभिड–१९ नियन्त्रण तथा रोकथामका लागि सरकारले २५ अर्ब अमेरिकी डलर छुट्याउने पनि उनले घोषणा गरेका छन् । ‘देइगु र उत्तरी गेयोन्साङ प्रान्तको संकट उचाइमा पुगेको छ । अब मुलुक घातक रोगविरुद्धको युद्धमा प्रवेश गरेको छ,’ राष्ट्रपति इनले भने । 

उनले सबै सरकारी संगठनलाई ‘२४ घण्टा आपतकालीन सेवासहितको प्रणाली’ मा विकास गर्न निर्देशन दिएका छन् । 

चीनमा घट्दै

चीनबाहिर भाइरसको संक्रमण र मृतकको संख्या बढ्दै गइरहेका बेला चिनियाँ स्वास्थ्य अधिकारीले भने चीनमा संक्रमण र मृतकको संख्या घटिरहेको तथ्याङ्क प्रस्तुत गरेका छन् । 

चिनियाँ राष्ट्रिय स्वास्थ्य आयोगले दिएको जानकारीअनुसार सोमबार थप १२६ जनामा मात्रै कोभिड–१९ को संक्रमण देखिएको छ । जनवरीयता चीनमा सबैभन्दा कम संख्यामा संक्रमण देखिएको हो । आइतबार भने चीनमा २०२ जनामा संक्रमण देखिएको थियो । त्यस्तै सोमबार चीनमा थप ३१ जनाको मृत्यु भएको स्वास्थ्य अधिकारीहरुले जानकारी दिएका छन् । मंगलबार बिहानसम्म चीनमा ८० हजारभन्दा बढीमा संक्रमण र दुई हजार ९ सयय ४३ जनाको मृत्यु भएको छ ।

कहाँ कति मृत्यु, कति संक्रमित?

स्रोत : विश्‍व स्वास्थ्य संगठन, चिनियाँ राष्ट्रिय स्वास्थ्य आयोग र विभिन्‍न समाचार एजेन्सी