धनगढी — कांग्रेस र एमालेबाट विद्रोह गरेर उम्मेदवार बनेका कसैले पनि मनोनयन फिर्ता नलिएपछि डडेलधुराको चुनावी माहोल रोचक बनेको छ । शुक्रबार प्रमुख पदका तीन जनाबाहेक कसैले पनि उम्मेदवारी फिर्ता लिएनन् । शनिबारदेखि उम्मेदवारहरू मत माग्न टोलबस्तीमा पुग्न सुरु गरेका छन् ।

डडेलधुरा सदरमुकामका व्यवसायी श्याम चटौतले उम्मेदवारको अन्तिम नामावली प्रकाशन अगाडि देखिएको अन्योल हटेपछि चुनावी माहोल विस्तारै तात्न सुरु गरेको बताए । उनले भने, ‘पार्टीहरूभित्र देखिएको अन्तरविरोध, कार्यकर्तामा निराशा, विगतका जनप्रतिनिधिका गतिविधिले चुनावप्रति चासो घटेको जस्तो देखिए पनि माहोल तात्न थालेको छ ।’ 

डडेलधुराको प्रवेशद्वार गन्यापधुराको गैरा बजारमा भेटिएका पुराना सामाजिक कार्यकर्ता रमेश बोकटीले यस पटक चुनावी माहोल लथालिंग बनेको बताए । ‘स्थानीय तह निर्वाचनमा देखिनुपर्ने रौनकता छैन । कोही चुनावका विषयमा कुरा पनि गर्न चाहँदैनन्,’ उनले भने ।

 डोटी–डडेलधुरा सिमानाको गैरा बजारमा भेटिएका अर्का स्थानीय हरिसिंह बोहराले पनि यस पटक चुनावप्रति धेरैको चासो नभएको टिप्पणी गरे । उनले भने, ‘५ वर्षसम्म जनप्रतिनिधिका गतिविधि देखेर दुःखी भएका सर्वसाधारणलाई मात्र होइन राजनीतिक कार्यकर्तालाई पनि चुनावप्रति त्यति धेरै चासो नहुँदानहुँदै पनि गाउॅंमा नेताकार्यकर्ताको चहलपहल सुरु भइसकेको छ ।’ डडेलधुरा सदरमुकामको बसपार्कसँग जोडिएको बागबजारमा केही झन्डा टाँगिएका छन् । त्यसबाहेक विगत जस्तो चोकचौतारामा चुनावी बहस, पसल होटलहरू भरिभराउ हुने डडेलधुरा बजारमा पनि त्यस्तो चहलपहल देखिएको छैन । बजारमा घुम्ने म्यादी प्रहरी र झन्डा लागेका गाडीको ओहोरदोहोरले चुनाव सुरु भएको आभास भए पनि विगतका चुनाव जस्तो तडकभडक देखिँदैन । 

 सदरमुकामको दोस्रो बजार तुफानडाँडामा कांग्रेसका विद्रोही र एमालेले खोलेको संयुक्त प्रचारप्रसार कार्यालयमा केही भीडभाड देखिए पनि अन्य दलका कार्यालयमा भने सामान्य चहलपहल पनि छैन । ‘उम्मेदवार र जिम्मेवार कार्यकर्ताहरू प्रचारप्रसारमा गाउँ पसेका छन्,’ अमरगढी नगरपालिका–४ का शिक्षक हरि ऐरले भने, ‘यस पटक तामझामभन्दा पनि घर दैलो कार्यक्रमलाई प्राथमिकता दिएका कारण माहोल नतातेको जस्तो देखिएको हो ।’ दलका नेताकार्यकर्ताले मतदाताको घर दैलोमा पुगेका, टोलटोलमा केन्द्रित प्रचारप्रसार गरिरहेको सामाजिक सञ्जालमा पोस्ट गरिरहेका छन् ।