म्याड्रिड — प्रशिक्षक लुइस डे ला फोन्टेले सोमबार विश्वकप फुटबलका लागि घोषणा गरेको स्पेनिस टोलीमा लामिन यामल स्टार खेलाडीको रूपमा रहेका छन् । चोटबाट फर्किएका आर्सनलका मिडफिल्डर मिकेल मेरिनोलाई पनि टोलीमा समावेश गरिएको छ ।

यो पहिलो विश्वकप हुनेछ, जहाँ स्पेनिस टोलीमा रियल म्याड्रिडका खेलाडी समावेश गरिएको छैन । रियल म्याड्रिडका रक्षकद्वय डिन हुइसेनलाई ‘ड्रप’ गरिएको छ भने चोटमा संघर्ष गर्दै सिजन बिताएका भेट्रान डानी कार्भाजललाई पनि टोलीमा राखिएको छैन । यस विषयमा डे ला फोन्टेले कुन खेलाडी, कहाँबाट आउँछ त्यो आफूले नहेर्ने गरेको बताए ।

प्रशिक्षक डे ला फोन्टेका प्रिय मेरिनोले आइतबार आर्सनलबाट क्रिस्टल प्यालेसविरुद्धको खेलमा वैकल्पिक भएर ६२ औं मिनेटमा मैदान प्रवेश गरेका थिए । खुट्टामा चोट बोकेयता उनले जनवरीपछि पहिलो खेल खेलेका हुन् ।

डे ला फोन्टेले यस सिजनमा प्रभावशाली प्रदर्शन गर्दै आएका रक्षकद्वय बार्सिलोनाका इरिक गार्सिया र एट्लेटिको म्याड्रिडका मार्स पुबिललाई पनि टोलीमा समावेश गर्दै हुइसेन र एट्लेटिकोका रोबिन ली नोर्मन्डलाई पाखा लगाएका हुन् ।

सिजन भरी फिटनेसको समस्या झेलिरहेका स्पेनलाई यूरो २०२४ को उपाधि दिलाउन महत्वपूर्ण भूमिका खेलेका बार्सिलोनाका १८ वर्षे यामल र एथलेटिक बिलबाओका निको विलियम्सले राष्ट्रिय टोलीमा निरन्तर स्थान पाएका छन् । ह्यामस्ट्रिङका कारण यामलले अप्रिल अन्तिम सातायता खेलेका छैनन् । उनले विश्वकपको पहिलो खेल खेल्नेमा द्विविधा नै छ ।

स्पेनिस टोलीमा रहेका बार्सिलोनाका आठ खेलाडीमध्ये एक हुन् यामल । बार्सिलोनाका मिडफिल्डरद्वय ग्याभी र पेड्री तथा गोलरक्षक योएन गार्सिया स्पेनिस टोलीमा छन् । ‘हामीले सबै क्लबको स्वास्थ्य शाखासँग समन्वय गरिरहेका छौं,’ टोलीको घोषणा गर्दै प्रशिक्षक डे ला फोन्टेले भने, ‘उनीहरूले दिएको रिपोर्टअनुसार हाम्रा सबै खेलाडी पहिलो वा दोस्रो खेलसम्म तयार भइसक्ने छन् ।’