काठमाडौँ — नेपाली कांग्रेसका महामन्त्रीद्वय गगनकुमार थापा र विश्वप्रकाश शर्माले आह्वान गरेको विशेष महाधिवेशनलाई लिएर राजनीतिक वृत्त तरंगित बनेको छ । विशेषतः थापा र शर्माको पार्टीभित्रैबाट सुरु गरेको वैचारिक र संगठनात्मक 'विद्रोह'ले यतिबेला राजनीति तरंगित बनेको हो ।

'कांग्रेस लास र दासहरूको पार्टी होइन' भन्दै विशेष महाधिवेशनको पक्षमा उभिएका महामन्त्रीद्वयको कदमलाई लिएर प्रमुख प्रतिपक्षी एमालेका नेताहरू र नयाँ पुस्ताका 'जेन-जी' अगुवाहरूले सामाजिक सञ्जालमा पक्ष र विपक्षमा रोचक टिप्पणी गरेका छन् ।

एमालेका उपमहासचिव योगेश भट्टराईले कांग्रेस महामन्त्रीद्वयको कदमप्रति ऐक्यबद्धता जनाउँदै प्रशंसा गरेका छन् । विगतमा आफूहरूले पनि पार्टीभित्र आवाज उठाएको स्मरण गर्दै उनले सामाजिक सञ्जालमा लेखेका छन्, 'हामीले बोल्यौँ, केही गर्‍यौँ । तपाईंहरूले बोल्नुभयो, हामीभन्दा धेरै गर्नुभयो । सलाम मित्रहरू !'

त्यस्तै, एमालेकी पूर्व केन्द्रीय सदस्य उषाकिरण तिमिल्सिनाले कांग्रेसका युवा नेताद्वयलाई 'परिवर्तनका पक्षधर' भन्दै शुभकामना दिएकी छन् । उनले गगन र विश्वप्रकाशले आफ्नो काँधमा आएको युगीन राजनीतिक दायित्व सफलतापूर्वक पूरा गरेको भन्दै प्रशंसा व्यक्त गरेकी छन् ।

एमालेका नेतासँगै जेन-जी अगुवाहरुले विश्व गगनको विद्रोहप्रति सम्मान जनाएका छन् । जेन-जी अगुवा भावना राउतले कांग्रेसभित्रको यो हलचललाई पार्टीको आन्तरिक लोकतन्त्र सुदृढीकरणको अवसरका रूपमा व्याख्या गरेकी छन् । उनले लेखेकी छन्, 'गगन थापा र विश्वप्रकाश शर्माले प्रतिनिधित्व गरेको धार विद्रोह होइन, आन्तरिक जवाफदेहीता हो । नेतृत्व प्रश्नबाट असहज हुनु र आलोचनात्मक आवाज दबाउन शक्ति प्रयोग गर्नुले परिवर्तनको आवश्यकता झन् स्पष्ट पार्छ ।' राउतका अनुसार यो साहस नेपाली कांग्रेसका लागि मात्र नभई देशकै राजनीतिक संस्कारका लागि नयाँ सुरुवात हुन सक्छ ।