काठमाडौं, पर्सा — मेडिकल व्यवसायी एवं ‘राष्ट्र, राष्ट्रियता, धर्म, संस्कृति र नागरिक बचाउ महाअभियान नेपाल’ का संयोजक दुर्गा प्रसाईं फेरि पक्राउ परेका छन् ।

सोमबार राति करिब ९ बजेतिर उनलाई वीरगन्जको आदर्शनगरस्थित दियालो होटलबाट नियन्त्रणमा लिइएको पर्सा प्रहरी प्रमुख सुदीपराज पाठकले जानकारी दिए । उनी उपर अफवाह फैल्याएको आरोप छ । ‘गलत अफवाह फैल्याएको आरोपमा प्रसाइलाई नियन्त्रणमा लिएका हौं,’ एसपी पाठकले भने, ‘थप अनुसन्धान भइरहेको छ ।’

सोमबार दिउँसो सिमरा विमानस्थल हुँदै वीरगन्जसम्म आइपुगेका प्रसाईंलाई उनका समर्थकले विमानस्थलदेखि वीरगन्जसम्म स्वागत गरेर ल्याएका थिए । वीरगन्ज आएर केही स्थानीय सञ्चारमाध्यमलाई दिएको अन्तर्वार्तामा प्रसाईंले 'संसदीय चुनावमा भोट नहाल्नुहोस्' भनेर चुनावअघि आफू वीरगन्ज आउन खोज्दा त्यतिबेला काठमाडौंको चाल्नाखेलबाट आफूलाई प्रहरीले पक्राउ गरेको बताएका थिए । दोस्रोपटक पनि प्रहरीले आफूलाई वीरगन्ज आउन नदिएको, तर यस पटक वीरगन्ज आउन सफल भएको उनले बताएका थिए ।

प्रधानमन्त्री वालेन्द्र शाहले मधेशीको छोरो भएपनि मधेश लगायत देशका अधिकांश सहर भत्काएर जनतालाई दुःख दिएको पनि उनले आरोप लगाएका थिए । वीरगन्ज पनि राति घोषणा गरेर बिहान उज्यालो हुन नपाउँदै भत्काएको आरोप लगाउँदै उनले नेपाली नागरिकलाई आपत् परेको बेला साथ दिनुपर्छ भन्ने सोचले आफू वीरगन्ज आइपुगेको बताएका थिए । यतिबेला सदनमा प्रतिपक्षको भूमिका खेल्न एमाले, कांग्रेस, राप्रपा लगायतका दल असफल भइरहेको अवस्थामा आफू प्रतिपक्षीको भूमिका खेली रहेको पनि उनको भनाइ थियो ।