काठमाडौँ —  

कान्तिपुरले हालै गरेको सर्वेक्षणमा जवाफदातामध्ये करिब ४० प्रतिशतले हाल देशमा आफूहरूले भर गर्न सक्ने कुनै दल नभएको बताएका छन् । राष्ट्रव्यापी सर्वेक्षणमा सहभागीलाई ‘हालको अवस्थामा तपाईंले भरपर्दो मान्ने कुनै राजनीतिक दल छ ?’ भनेर प्रश्न सोधिएकामा ४० प्रतिशतले भरपर्दो दल नरहेको बताउँदा १४ प्रतिशतले ‘थाहा छैन’ भनेका छन् । एक प्रतिशतले भने ‘उत्तर दिन चाहन्न’ भनेका छन् । 

यसले आधाभन्दा बढी (करिब ५५ प्रतिशत) जनताको रोजाइमा कुनै पनि राजनीतिक दल नपरेको देखाउँछ । करिब ४५ प्रतिशतले भने आफूले भर मान्ने कुनै न कुनै दलको नाम लिएका छन् । 

एक महिनाअघि गरिएको सर्वेक्षण भएकाले प्रतिनिधिसभाको निर्वाचन आउन पाँच दिन मात्र बाँकी रहेको अहिलेको अवस्थालाई ठ्याक्कै चित्रण नगर्ने सम्भावना पनि हुन सक्छ ।

भरपर्दो दल कुनै पनि छैनन् भन्ने वा त्यसबारे मलाई थाहा छैन भन्ने दुवैखाले जवाफ दिनेहरू पुरुषभन्दा महिला बढी छन् । हरेक १०० मा ४२ जना महिलाले भरपर्दो दल कुनै छैनन् भनिरहँदा त्यस्तो जवाफ दिने पुरुषहरू भने ३६ जनाको अनुपातमा छन् । त्यस्तै १०० मा २० जना महिलाले आफूलाई थाहा नभएको जवाफ दिएका छन् भने त्यस्तो जवाफ दिने पुरुषहरू ६ जना मात्र छन् । उमेरगत रूपमा पनि यो प्रश्नको जवाफमा विविधता देखिन्छ । ३० वर्षभन्दा कम उमेरका उत्तरदातामध्ये हरेक १०० मा २० जनाले ‘थाहा छैन’ भनेका छन् भने उमेरगत रूपमा ६० वर्षभन्दा माथि जाँदा त्यस्तो संख्या केबल ७ छ । अर्थात् देशमा भरपर्दो दलबारेको प्रश्नमा निर्णय/दाबी नगर्ने प्रवृत्ति युवामा बढी छ ।