जुम्लाका ५५ वर्षीय मदनबहादुर बुढालाई काठमाडौंको भृकुटीमण्डपमा जारी कांग्रेसको विशेष महाधिवेशन स्थलमा गाँजा र ढाकाबाट बनेका कोट, इस्टकोट र टोपी बेच्न भ्याइनभ्याइ छ ।
काठमाडौँ — गाँजाको टोपी र ढाकाको कोटले कांग्रेसको दोस्रो विशेष महाधिवेशनका प्रतिनिधिहरुको ध्यान खिचेको छ । जुम्लाका ५५ वर्षीय मदनबहादुर बुढालाई काठमाडौंको भृकुटीमण्डपमा जारी कांग्रेसको विशेष महाधिवेशन स्थलमा गाँजा र ढाकाबाट बनेका कोट, इस्टकोट र टोपी बेच्न भ्याइनभ्याइ छ ।
उनी दुई वर्षदेखि गाउँमा महिला समूहले उत्पादन गरेका गाँजाका इस्टकोट, फुलकोट, झोला र टोपी बिक्री गर्दै आएका छन् । धनुषा, उदयपुर र वीरगन्जलगायत स्थानमा गएर यी सामग्री बेच्दै आएका उनले कांग्रेसको विशेष महाधिवेशनबारे थाहा पाएपछि काठमाडौं आएको बताए ।
'पहिले शिक्षक आन्दोलन र राप्रपाको आन्दोलनका बेला आउँदा राम्रो बिक्री भएको थियो,' उनले भने, 'त्यही माहोल देखेर यसपटक पनि आएको हुँ । यहाँ पनि राम्रो व्यापार भइरहेको छ ।'
उनका अनुसार इस्टकोट र टोपी किन्नेको संख्या बढी छ ।
'गाउँमै मेरी श्रीमतीसहित उनका साथीहरूले तानमा बुनेका सामग्री हुन्,' उनले भने, 'ओरिजिनल भएकै कारण सबैले मन पराएका छन् ।' उनले आफूसँग भएका २ हजार पिस टोपी, इस्टकोट १ हजार पिस, फुलकोट ५ सय पिस र झोला १ सय पिस बेचेर सक्ने योजनामा रहेको बताए ।
