काठमाडौँ — महान्यायाधिवक्ता कार्यालयले किशोरीको डिम्ब निकालेर बेचविखन गरेको आरोपमा महान्यायाधिवक्ताको कुनै पनि संलग्नता नभएको भन्दै खण्डन गरेको छ।

शुक्रबार एक विज्ञप्ति जारी गर्दै महान्यायाधिवक्ता कार्यालयले महान्यायाधिवक्ताबाट आफूले निर्णय गर्न नमिल्ने भएकोले नायब महान्यायाधिवक्ताबाट नै मुद्दा चल्ने/नचल्ने आवश्यक निर्णय गर्न तोकेको र नायब महान्यायाधिवक्ता तहबाट मिसिल तथा प्रमाण कागजका आधारमा प्रस्तुत मुद्दामा मुद्दा नचलाउने गरी असोज ३१ मा निर्णय भएको दाबी गरिएको छ। 

‘बालबालिका सम्बन्धी ऐन,२०७५ को दफा ६६ अन्तर्गत बालबालिकाविरुद्धको हिंसा र बालबालिकाविरुद्वको यौन दुर्व्यवहारसम्बन्धी कसूरभित्र उक्त विषय स्पष्ट रूपमा निषेध गरेको नदेखिएकोसमेतका आधारमा मुद्दा नचल्ने निर्णय भएको हो,’ विज्ञप्तिमा भनिएको छ,‘मुद्दाको अनुसन्धानबाट संकलित तथ्य, प्रमाण र कानुनी आधारको अध्ययन नगरी समाचारमा अन्यथा प्रकाशन भएको र  महान्यायाधिवक्ताको निर्णयमा कुनै भूमिका नरहेको जानकारी गराउँदछौँ । ’