काठमाडौँ — इजरायलका लागि नेपाली राजदूत धनप्रसाद पण्डितले हमासले रिहा गर्न लागेको २० जनाको सूचीमा विपिनको जोशीको नाम नरहेको औपचारिक जानकारी प्राप्त भएको बताएका छन् ।

उनले बहुराष्ट्रिय सेनाले जोशीको गाजा क्षेत्रभित्र रहेको हमासको सुरुङभित्र खोजी भइरहेको तर हालसम्म अवस्था अज्ञात रहेको जानकारी दिए । 

‘बिहान इजरायलको ७:३० बजे इजरायली सेनाबाट फोन आयो । म, विपिनको दाजु किशोर जोशी, बहिनी पुष्पा जोशी र इजराली सेनाको प्रतिनिधिबीच सामूहिक रुपमा भिडियो कलमा कुराकानी भयो । त्यसमा इजरायली सेनाले विपिन जोशी जीवितको सूचीमा नरहेको सूचना आधिकारीक रुपमा बताए,’ पण्डितले कान्तिपुरसँग भने ।

विपिनको शव प्राप्त भइ नसकेको र बहुराष्ट्रिय सेनाले टनेलभित्र खोजिरहेको उनले बताए । त्यसपछि इजरायलले पछिल्लो अपडेट दिइसकेको छैन । विपिन जोशीलाई ७ अक्टोबर २०२३ मा हमासले बन्धक बनाएर लिएर गएको थियो ।

त्यो बैठकमा सहभागी विपिनका दाजु किशोर जोशीले सबै बन्धकको रिहाई नभएसम्म आफूहरु विपिन जीवित रहेकोमा आशावादी रहेको बताए । ‘बिहान इजरायली पक्षसँग कुरा भयो । उनीहरुले २० जनाको जीवित सूचीमा नपरेको जानकारी दिए । तर जबसम्म सबै बन्धकको रिहाई हुँदैन । तबसम्म हामी आशामा बसेका छौं,’ उनले भने ।