काठमाडौँ — भाद्र २३ र २४ को घटनासम्बन्धी जाँचबुझ आयोगले फौजदारी कसुरमा संलग्न जोकोहीलाई तत्काल अनुसन्धान र कारबाही गर्न आयोगको प्रतिवेदन कुर्न नपर्ने प्रस्ट पारेको छ ।

आयोगका सदस्य विज्ञानराज शर्माले मंगलबार विज्ञप्ति प्रकाशित गरी उक्त घटनामा संलग्नलाई सरकारी संयन्त्रहरुबाट अनुसन्धान र कारबाही गर्न सकिने जनाएका हुन् । 

प्राप्त कार्यादेशविपरीत गृह मन्त्रालयले असोज ९ मा जारी गरेको विज्ञप्तिप्रतिसमेत आयोगले ध्यानाकर्षण भएको जनाएको छ । 'यस आयोगलाई भौतिक एवं मानवीय क्षतिसँग सम्बन्धित सूचना वा निवेदन ग्रहण गरी विश्लेषण गर्ने र कारबाहीका सम्बन्धमा आवश्यक राय दिने समेतका कार्यादेश रहेको हुँदा आयोगबाट सो कार्यादेशबमोजिम रायसहितका प्रतिवेदन प्राप्त भएपश्चात् नेपाल सरकारले कानुनबमोजिम गर्ने भन्ने गृह मन्त्रालयबाट २०८२/०६/०९ गते जारी विज्ञप्तिप्रति आयोगको ध्यानाकर्षण भएको छ,' विज्ञप्तिमा उल्लेख छ । 

गृह मन्त्रालयले असोज ९ गते विज्ञप्ति जारी गरेर जाँचबुझ आयोगको प्रतिवेदन आएपछि मात्रै कारबाही गर्नु र तत्काल पक्राउ तथा अन्य कानुनी कारबाही तथा पक्राउ नगर्नु भनेको थियो । आयोगका अध्यक्ष गौरीबहादुर कार्कीले पनि सोमबार कान्तिपुरसँग कुरा गर्दै भदौ २३ र २४ गते भएका फौजदारी कानुन आकर्षित हुने घटनाको छानबिन नियमित कानुनी प्रक्रियामा जान अवरोध नपुग्ने बताएका थिए ।