काठमाडौँ — समाचारको प्रतिशोधमा कान्तिपुर मिडिया ग्रुपमा सरकारले हस्तक्षेप गरेकामा चिन्ता व्यक्त गर्दै युरोपेली संघ (ईयू) ले प्रधानमन्त्री पुष्पकमल दाहाललाई पत्र लेखेको छ ।

कान्तिपुरका अध्यक्षलाई पक्राउ गरिएको घटनाले नागरिक अधिकार र प्रेस स्वतन्त्रताप्रति नेपालको प्रतिबद्धता र प्रतिष्ठामा दाग लाग्ने जोखिम बढेको भन्दै ईयूले नेपाल सरकारको ध्यानाकर्षण गराएको हो ।

‘नेपालसँगको सद्भावपूर्ण सहकार्यमा विश्वास गर्ने हामीहरू कान्तिपुर अध्यक्षलाई पक्राउ गरिएको घटनाप्रति चिन्तित छौं, नागरिकताको बहाना अघि सारिए पनि वास्तवमा यो नागरिक अधिकार र प्रेस स्वतन्त्रतामाथि हमला हो भन्दै विभिन्न संस्थाहरूले निन्दा गरेको विषयबाट पनि हामी जानकार छौं,’ पत्रमा भनिएको छ ।

नेपालका लागि ईयूकी राजदूत भेरोनिक लोरेन्जोले प्रधानमन्त्री दाहाललाई पत्र लेख्दै भनेकी छन्, ‘शान्ति, संवाद, प्रेस स्वतन्त्रता र लोकतान्त्रिक अभ्यासमा नेपालसँग थप सहकार्य गर्न हामी सधैं उत्सुक छौं । तर, नागरिक अधिकार र प्रेस स्वतन्त्रतालाई सम्मान गर्दै नेपालले आर्जन गरेको प्रतिष्ठामा यस्ता घटनाले दाग लगाउने जोखिम छ । त्यसैले यस विषयमा सरकार प्रमुखका रूपमा तपाईंले पक्कै पनि भूमिका खेल्नुहुनेछ भन्ने हाम्रो विश्वास छ ।’

दुई साताअघि मे १६ मा प्रधानमन्त्री दाहाल र ईयूका राजदूतहरूको भेटवार्ता भएको र उक्त अवसरमा साझा मूल्यमा आधारित बलियो साझेदारीका विषयमा भएको छलफलको प्रसंग पनि पत्रमा स्मरण गरिएको छ । ‘तपाईं (प्रधानमन्त्री) आफैंले भन्नुभएको थियो कि नेपाल शान्तिप्रेमी देश हो । प्रजातन्त्र, विधिको शासन र मौलिक स्वतन्त्रताका मूल्यहरूलाई दृढतापूर्वक समर्थन गर्ने देश हो,’ पत्रमा भनिएको छ, ‘यी पक्षहरूले नै नेपाललाई ईयू र यसका सदस्यहरूका लागि महत्त्वपूर्ण सम्मानित साझेदार बनाएको हो । शान्ति, लोकतन्त्र र प्रेस स्वतन्त्रताप्रतिको प्रतिबद्धतालाई नेपाल सरकारले उच्च प्राथमिकतामा राख्नेछ भन्ने हाम्रो विश्वास छ ।’