भ्रष्टाचारको व्यापकता तथा सुशासनको अभाव, पुँजीगत खर्च कार्यान्वयन क्षमतामा देखिएको समस्या र चरम व्यापार घाटा अर्थतन्त्रलाई सकारात्मक दिशामा लैजानका लागि समाधान गरिनुपर्ने प्राथमिकताका विषय रहेको माओवादी केन्द्रको प्रतिबद्धतापत्रमा लेखिएको छ । 'यस क्षेत्रमा ठोस नीति र कार्ययोजना बनाई कडाइपूर्वक कार्यान्वयन गरिनेछ,' माओवादीले भनेको छ । 

माओवादी केन्द्रले आफ्नो पार्टीका 'सबै केन्द्रीय समितिका सदस्यहरू एवं प्रदेश समितिका पदाधिकारीहरूको सम्पत्ति विवरण निर्वाचन सम्पन्न भएको ६ महिनाभित्र सार्वजनिक गर्ने' प्रतिबद्धता पनि जनाएको छ । प्रत्येक आर्थिक वर्षको पहिलो ३ महिनाभित्रमा केन्द्रीय समितिका सदस्यहरू र प्रदेश पदाधिकारीहरूको सम्पत्ति विवरण सार्वजनिक गरिने पनि माओवादीले प्रतिबद्धतापत्रमा लेखेको छ ।

माओवादीले 'स्थिरता, शान्ति र समृद्धिका लागि शासकीय स्वरुप र निर्वाचन प्रणाली परिवर्तन गर्ने' भनेको छ । त्यस्तै न्यायपालिका र प्रशासन संयन्त्रको जनमुखी पुनर्संचना गर्ने प्रतिबद्धता जनाएको छ । युवा शक्तिलाई देश निर्माणमा परिचालन गर्ने तथा विदेशमा रहेकालाई स्वदेश फर्किने वातावरण बनाउने माओवादीले प्रतिबद्धतापत्रमा लेखेको छ ।

आमनिर्वाचन २०७९