एम. अधिकारी खोजे हुन्छ, म टर्चको ब्याट्री किनिदिन्छु : ओली

आइतबार कान्तिपुर मिडिया ग्रुपद्वारा आयोजित तेस्रो कान्तिपुर कन्क्लेभको दोस्रो दिनको समापन सत्र ‘नीति, थिति र राजनीति’ विषयमा बोल्दै ओलीले अर्थमन्त्री जनार्दन शर्माले बजेटमा गरेको अनियमिततालाई लुकाउनका लागि एमालेको अर्थ विभागका एम. अधिकारीको प्रसंग सत्तापक्षले झिकेको पनि आरोप लगाए ।

'खोजे हुन्छ; एम. अधिकारी कहाँ छ ? म टर्चको ब्याट्री किनिदिन्छु । एम. अधिकारी को हो म पनि जान्दिनँ,' उनले आफ्नै अर्थ तथा योजना विभागको सदस्य नचिन्ने पनि बताए ।

एमाले केन्द्रीय विभागमा एम. अधिकारी सदस्य भएको सार्वजनिक भएको थियो । नेपाल राष्ट्र बैंकका गभर्नर महाप्रसाद अधिकारी नै एम. अधिकारी भएको सार्वजनिक बहसमा आएको थियो । २०७३ सालमा महाप्रसाद अधिकारी एमालेको उक्त विभागको सदस्यमा थिए ।

खोटाङका अधिकारी छोटकरी नाम उल्लेख गरेर पार्टीको केन्द्रीय विमागमा बसेको भनेर आलोचना भएको थियो । एमाले अध्यक्ष ओलीले भने आफूले पनि एम. अधिकारीलाई नचिन्ने भन्दै खोज्ने भए टर्चको ब्याट्री किनिदिने भन्ने जवाफ दिनुका साथै विगतमा र अन्य निकायमा पनि त्यस्ता व्यक्ति रहेको उल्लेख गरेका छन् ।

ओलीले अहिलेसम्मका गभर्नरहरू, मानवधिकार आयोगका आयुक्तहरू, न्यायाधीशहरू राजनीतिक दलमा आबद्ध व्यक्ति भएको बताए । उनले निष्पक्ष भूमिका निर्वाह गर्नुपर्ने राष्ट्रपति, उपराष्ट्रपति, सभामुख, राष्ट्रिय सभा अध्यक्ष पनि राजनीतिक दलका भएकाले त्यस्तो भूमिका निर्वाह हुन नसेकको बताए ।

एउटा पार्टीको केन्द्रीय विभागमा रहेको व्यक्ति सोझै न्यायाधीश सिफारिस गरिएको भन्दै उनले एम. अधिकारीबारे अनावश्यक चर्चा भएको बताए । उनले सर्वोच्च अदालतको न्यायाधीश कुन-कुन राजनीतिक पृष्ठभूमिका छन् भन्ने कुरा स्पष्ट रहेको पनि बताए ।