बाजुराको बुढीगंगा नगरपालिकामा पुनः मतदान गराउन कांग्रेसकाे माग- समाचार - कान्तिपुर समाचार
कान्तिपुर वेबसाईट
AdvertisementAdvertisement

बाजुराको बुढीगंगा नगरपालिकामा पुनः मतदान गराउन कांग्रेसकाे माग

कान्तिपुर संवाददाता

काठमाडौँ — सत्तारुढ दल नेपाली कांग्रेसले बाजुराको बुढीगंगा नगरपालिकामा पुनः मतदान गराउन माग गरेको छ । कांग्रेसले विज्ञप्ति जारी गर्दै बुढीगंगा नगरपालिकामा पुनः मतदान गराउन निर्वाचन आयोगसँग माग गरेको हो ।

यहाँका अधिकांश मतदान केन्द्रमा नेकपा एमालेका कार्यकर्ताहरुले कांग्रेसका उम्मेदवार र प्रतिनिधिहरुलाई आक्रमण गरी घाइते बनाउने, मतदान केन्द्रबाट लखेट्ने, थुनछेक गर्ने र मतदान केन्द्र आफ्ना कार्यकर्ताको नियन्त्रणमा राखी (बुथ कब्जा गरी) फर्जी मत हाल्ने काम गरेको कांग्रेसको आरोप छ ।

शुक्रबार कांग्रेस कार्यालयका मुख्यसचिव कृष्णप्रसाद पौडेलले विज्ञप्तिमार्फत् भयरहित वातावरणमा स्वविवेकले मतदाता स्वयंले मतदान गर्न पाउने संवैधानिक अधिकारलाई चुनौती दिँदै एमालेले बाहुबलको प्रयोग र बुथ कब्जा जस्तो अलोकतान्त्रिक कार्य गरेको भन्दै निन्दा र भत्सर्ना गरेका छन् ।

‘निर्वाचनमा खटिएका सुरक्षाकर्मी, राष्ट्रसेवक कर्मचारी, विभिन्न राजनीतिक दलका उम्मेदवार तथा प्रतिनिधि र मतदातालाई सुरक्षित राख्नका लागि निषेधाज्ञा (कफ्र्यू) जारी गर्नु परेको घटनाले स्थिति निकै भयावह भएको स्पष्ट छ,’ कांग्रेसले भनेको छ, ‘बढ्दो असुरक्षा र भयरहित वातावरणमा निर्वाचन गर्ने अवस्था नभएका कारण सदरमुकाम पुगेर राजिनामा दिइसक्नुभएका निर्वाचन अधिकृतलाई घेराबन्दीमा पारेर कब्जा गरिएका मतदान केन्द्रका मतपेटिकाहरु बुझ्न बाध्य पारिएकोले नगरपालिकामा भयरहित वातावरणमा स्वच्छ र निश्पक्ष निर्वाचन हुन नसकेको स्पष्ट हुन आउछ ।’

प्रकाशित : जेष्ठ ६, २०७९ १७:५४
प्रतिक्रिया
पठाउनुहोस्

निर्वाचनमा खटिएका प्रहरीका असईले हवल्दार कुटे

शिव पुरी

रौतहट — वीरगन्जको विपद् व्यवस्थापनमा कार्यरत प्रहरी सहायक निरीक्षक (असई) कमलेश यादवले ट्राफिक प्रहरीका सहायक हवल्दार राजकिशोर यादव र उनका भाइ सिकन्दर यादवलाई कुटपिट गरेका छन् ।

कुटपिटबाट दुवैजना घाइते छन् । बारास्थित आदर्श कोतवाल गाउँपालिकामा मतगणनामा खटिएको असई यादव पेस्तोल बोकेर बिना जानकारी रौतहट आएका हुन् । घट्नापछि असई यादव भागेर कार्यरत स्थान बारामा हाजिर भएका छन् । घाइते दुवैको जिल्ला अस्पताल गौरमा अस्पतालमा उपचार भइरहेको छ ।

रौतहटको मौलापुर नगरपालिका ८ स्थित सोनरियामा मोटरसाइकल समातेको विषयलाई लिएर बाराको आदर्श कोतवाल गाउँपालिकास्थित च्यूटामा स्थानीय तहको निर्वाचनको मतगणनामा खटिएका प्रसनी यादव संगठनलाई जानकारी नदिई रौतहट आई हवल्दार र उनका भाई माथि आक्रण गरेको हुन् ।

यादवले घरेलु हतियार प्रहार गरको घाइते सिकन्दरले बताए । ‘असई पेस्तोल नै बोकेरै आएको थियो,’ उनले भने, ‘उनले पहिलेदेखि नै कुट्छु भनेर धम्की दिएको थियो । अहिले आक्रमण गर्‍यो।’ कुटपिटमा घाइते ट्राफिक सहायक हवल्दार बाराको लंँगडा चोकस्थित अस्थायी ट्राफिक पोष्टमा कार्यरत छन् ।

उनको घर सोनरनिया हो । औषधी लिन भन्दै घर आएका ट्राफिक हवल्दार राजकिशोर र उनका भाइ सिकन्दरलाई असई यादवले कुटेर घाइते बनाएका हुन् । हवल्दार यादव पनि बिना जानकारी रौतहट आएका हुन् । घट्ना लगत्तै असई यादवलाई पक्रने प्रयास गरे पनि उनी भागेर बारा हाजिर भएको इलाका प्रहरी कार्यालय मौलापुरका इन्चार्ज प्रहरी निरीक्षक नन्दकिशोर चौहानले बताए । ‘हामीले बाराका प्रहरी प्रमुख एसपीलाई सबै जानकारी गराइसकेका छौं, ’ उनले भने, ‘घट्नाबारे अनुसन्धान भइरहेको छ ।’ प्रनि चौहानका अनुसार घाइतेलाई उपचारको लागि जिल्ला अस्पताल गौर पठाइएको छ ।

दुवैको नाक र टाउकोमा चोट लागेको छ । महोत्तरी दरबन्दी भएका असई यादब केही दिन अघि मात्र वीरगन्जस्थित बिपतमा काज आएका हुन् । चुनावका बेला उनी बाराको आदर्श कोतवाल गाउँपालिका खटे । त्यहाँ अहिले मतगणना जारी छ ।

जिल्ला प्रहरी बाराका प्रमुख एसपी दिलिप सिंह देउवाले सोनरनियामा भएको कुटपिटको घट्नाको रौतहट प्रहरीले अहिलेसम्म कुनै जानकारी नगराएको बताए । ‘मलाई घट्ना बारे केही थाहा छैन् । कुटपिट गर्ने असईलाई रौतहट प्रहरीले पक्राउ गरेको होला, ’ उनले भने, ‘घट्नामा स‌ंलग्‍न भए कारबाही हुन्छ ।’

प्रकाशित : जेष्ठ ६, २०७९ १७:५३
पूरा पढ्नुहोस्
प्रतिक्रिया
पठाउनुहोस्
×