कांग्रेसको निर्वाचन समितिको बैठक बस्दै- समाचार - कान्तिपुर समाचार

कांग्रेसको निर्वाचन समितिको बैठक बस्दै

कान्तिपुर संवाददाता

काठमाडौँ — कांग्रेसको केन्द्रीय निर्वाचन समितिले पदाधिकारी र केन्द्रीय सदस्यहरूको मत गणना गर्ने विषयमा छलफल गर्न बैठक बोलाएको छ । १४ औँ महाधिवेशनअन्तर्गत सोमबार भएको मतदानको गणना गर्ने विषयमा छलफल गर्न बैठक बोलाइएको समितिका सदस्य एगराज पोखरेलले जानकारी दिए ।

उनका अनुसार बुधबार दिउँसो १ बजे बस्ने गरी बैठक बोलाइएको छ । बैठकले मतगणना कसरी गर्ने ? भन्ने व्यवस्थापकीय पक्षको टुंगो लगाएपछि मात्रै मतगणना सुरु हुने उनले बताए ।

‘आजैबाट मतगणना गरौँ भन्ने तयारी छ, बैठकपछि टुंगो लाग्छ,’ उनले भने, ‘हामी ढिलोमा १० दिनभित्र सबै परिणाम दिने गरी काम गर्दैछौँ ।’ यसअघि समितिका संयोजक गोपालकृष्ण घिमिरेले ५ पुसभित्रै परिणाम आइसक्ने बताएका थिए । १३ औँ महाधिवेशनमा मतगणनाका लागि १७ दिन लागेको थियो ।

कांग्रेसले आफ्नो निर्वाचनमा डिजिटल प्रविधिको प्रयोग नगर्दा निर्वाचनको परिणाम आउन समय लाग्ने भएको हो ।

महाधिवेशनमा देशभरका ४ हजार ७ सय ४३ महाधिवेशन प्रतिनिधिहरू सहभागी थिए । नेतृत्व चयनकालागि भने ४ हजार ६ सय ७९ मत खसेको छ । अब उपसभापति, महामन्त्री, सहमहामन्त्री र केन्द्रीय सदस्यहरूको मतगणना गर्न बाँकी रहेको छ । यसपटक पदाधिकारीसहित १३४ पदमा निर्वाचन भएको थियो ।

प्रकाशित : मंसिर २९, २०७८ १३:१८
प्रतिक्रिया
पठाउनुहोस्

विद्युत् बेच्नेभन्दा स्वदेशमै खपतको नीति लिनुपर्छ : अर्थमन्त्री 

माघदेखि पुँजीगत खर्च बढ्ने दाबी 
कान्तिपुर संवाददाता

काठमाडौँ — अर्थमन्त्री जनार्दन शर्माले राजनीतिक परिवर्तनका कारण पनि पुँजीगत खर्च हुन नसकेको बताएका छन् । बुधबार नेपाल उद्योग वाणिज्य महासंघले गरेको नव उत्थान सम्मेलनको उद्घाटन कार्यक्रमलाई सम्बोधन गर्दै उनले सरकार परिवर्तन, बजेट परिमार्जन जस्ता राजनीतिक कारणले पुँजीगत खर्च समयमै हुन नसकेको उल्लेख गरे ।

सबै मन्त्रालयसँग खर्च बढाउनेबारे छलफल भइरहेकोले पुस माघदेखि नै पुँजीगत खर्च बढ्ने उनले दाबी गरे । त्यस्तै बन्द उद्योग संचालनका लागि सरकारले नीतिगत रुपमा तयारी गरिरहेको उनले बताए । निजी क्षेत्रसँग सहकार्य गरेर नै ती उद्योग संचालन गरिने उनको भनाइ छ ।

अर्थमन्त्री शर्माले विद्युत् बिक्रीभन्दा स्वदेशमै खपत गर्नुपर्ने नीति लिनुपर्ने बताए । स्वदेशमै विद्युत खपत हुँदा बस्तु उत्पादन तथा रोजगारी बढ्ने उनको भनाइ छ । उत्पादनमूलक उद्योगहरुलाई विद्युत् महशुल घटाउन सकिने उनले बताए । हाल कतिपय उद्योगले भनेजति विद्युत नै नपाएको गुनासो गरिरहेका छन् । सो प्रसंगलाई उल्लेख गर्दै मन्त्री शर्माले भने ‘विद्युत उद्योगलाई नदिने अनि खेर फाल्ने किसिमको नीतिलाई सरकारले सच्याउँछ । एकातिर विद्युत खेर गइरहेको छ, अर्कोतिर उद्योगले चलाउन पाएको छैन । यसले गर्दा रोजगारी सृष्टि हुन पाएको छैन ।’

विद्युत बिक्रीबाट अर्थतन्त्र बलियो नहुने भएकाले स्वदेशकै उत्पादनशील उद्योगहरूलाई सस्तो दरमा दिएर खपत बढाउन सकिने बताए । यसबारे नीति परिमार्जन गर्नेगरी मन्त्रालय र सम्बन्धित निकायसाग छलफल भइरहेको उनको भनाइ छ । कुन उद्योगलाई कहाँ, कति विद्युत उपलब्ध गराउनुपर्ने हो त्यसको यथेष्ट तथ्याङ्क बनाएर विद्युत् उपलब्ध गराउनुपर्ने उनले बताए ।

प्रकाशित : मंसिर २९, २०७८ १३:१४
पूरा पढ्नुहोस्
प्रतिक्रिया
पठाउनुहोस्
×