लिपुलेक, कालापानी र लिम्पियाधुरामा मेकानिज्म बनाएर जनगणना हुन्छ : परराष्ट्रमन्त्री खड्का*- समाचार - कान्तिपुर समाचार
कान्तिपुर वेबसाईट
AdvertisementAdvertisement

लिपुलेक, कालापानी र लिम्पियाधुरामा मेकानिज्म बनाएर जनगणना हुन्छ : परराष्ट्रमन्त्री खड्का*

कान्तिपुर संवाददाता

काठमाडौँ — परराष्ट्रमन्त्री नारायण खड्काले लिपुलेकमा तत्काल जनगणना नहुने संकेत गरेका छन् । शनिबार विराटनगर विमानस्थलमा पत्रकारहरूसँगको कुराकानीमा परराष्ट्रमन्त्री खड्काले लिपुलेक, लिम्पियाधुरा र कालापानीको विषयमा भारतसँग वार्तामार्फत विवाद समाधान गरिने बताएका हुन् ।

मन्त्री खड्काले यसअघि सरकारले भारतलाई पठाएका नोटहरू अध्ययन गरेर आफू समस्या समाधानमा लाग्ने पनि बताएका छन् ।

नयाँ नक्सामा समेटिएका नेपाली भूभाग लिपुलेक, कालापानी र लिम्पियाधुरामा जनगणना हुन्छ कि हुँदैन भन्ने पत्रकारको प्रश्नमा परराष्ट्रमन्त्री नारायण खड्काले भने, ‘त्यो त अब उसलाई सोध्नुपर्छ । उसले आफ्नो तरिकाले एउटा मेथडोलोजी र मेकानिज्म बनाएर जनगणना गर्ने भनेको छ ।’

राष्ट्रिय जनगणनाका लागि सुरपरिवेक्षण पठाउनै आनाकानी गर्दा मुलुकको कालापानी, लिपुलेक क्षेत्रमा घर तथा घरपरिवार सूचीकरण हुन सकेको छैन । पहिलो चरणको सूचीकरणका लागि उक्त क्षेत्रमा जान नेपालबाटै बाटो नभएको र भारतको बाटो भएर जानका लागि सरकारले नअह्राएको भन्दै जिल्ला तथ्यांक कार्यालयले सुपरिवेक्षक नै पठाएन । राष्ट्रिय जनगणना २०७८ को पहिलो चरणमा अहिले घर तथा घरपरिवार सूचीकरण कार्यमा सात प्रश्‍न लिएर सुपरिवेक्षक घरदैलो गर्न थालेका छन् । यही कात्तिक २५ गतेदेखि मंसिर ९ गतेसम्म राष्ट्रिय जनगणनाको मूल गणना कार्य हुँदैछ ।

दार्चुलाको व्यास गाउँपालिका–१ को छाङरु र तिंकर छन् भने त्योसँगै जोडिएर कालापानी, लिपुलेक भूमि पर्दछ । उक्त क्षेत्रमा २०१८ सालपछि जनगणना हुन सकेको छैन ।

सरकारले २०७७ साल जेठ ७ गते नेपालको नयाँ राजनैतिक नक्सा औपचारिक रुपमा सार्वजनिक गरेको थियो । कालापानी, लिपुलेक र लिम्पियाधुरा समेटिएको नेपालको नयाँ राजनैतिक नक्सा सार्वजनिक भएपछि भारतले औपचारिक रूपमा प्रतिक्रिया दिँदै क्त नक्सा मान्य नहुने बताएको थियो ।

त्यस्तै कालापानी, लिपुलेक र लिम्पियाधुरालाई नेपालको नक्सामा राखेपछि निशान छापमा यो नक्सालाई समावेश गर्नलाई संविधानको अनुसूची ३ संशोधन गर्न ल्याइएको संविधान संशोधन विधेयक २०७७ साल जेठ ३१ गते प्रतिनिधिसभाबाट सर्वसम्मतिले पारित भएको थियो ।


*यसअघिको समाचारको शीर्षकमा 'लिपुलेक, कालापानी र लिम्पियाधुरामा जनगणना गर्न भारतलाई सोध्‍नुपर्छ : परराष्ट्रमन्त्री खड्का' भएकोमा परराष्ट्रमन्त्रीको सचिवालयले 'त्यो त अब उसलाई सोध्नुपर्छ' भनेर भारतलाई नभई केन्द्रीय तथ्यांक विभागलाई संकेत गरेको स्पष्ट पारेपछि सच्याइएको छ । -सम्पादक

प्रकाशित : कार्तिक ६, २०७८ १२:५३
प्रतिक्रिया
पठाउनुहोस्

अब पार्टी एक ढिक्का छ : ओली 

कान्तिपुर संवाददाता

काठमाडौँ — माधवकुमार नेपालले आफ्नो समूह लिएर बाहिरिएपछि पार्टी एकढिक्का रहेको एमाले अध्यक्ष केपी शर्मा ओलीले बताएका छन् । देशभरका वडा कमिटीको अधिवेशन उद्घाटन गर्दै ओलीले अहिले पार्टीमा कुनै समस्या नरहेको दाबी गरेका हुन् । 

थापाथलीस्थित पार्टी केन्द्रीय कार्यालयबाट भर्चुअल माध्यमबाट वडा अधिवेशनहरूलाई शनिबार सम्बोधन गर्दै ओलीले विगत डेढ वर्षयता पार्टीमा समस्या देखिएको तर अहिले त्यस्तो समस्या बाँकी नरहेको बताएका हुन् ।

'पार्टीमा एउटा सकरात्मक कुरा के देखिएको छ भने अब पार्टी एकढिक्का छ । पार्टीको बदनाम गर्ने, बेइज्जत गर्ने र बढाइचढाइ पार्टीभित्रका समस्या देखाउने कुरा रहेन,' ओलीले भने, 'प्रचण्डले पार्टी छोडेर बहिर्गमन गरेपछि र माधव गुटले फरक ढंगले प्रस्तुत भइसकेपछि पार्टी नयाँ ढंगले अगाडि बढेको छ ।'

पार्टीलाई यसबीचमा सरकारबाट हटाउने खेल पार्टीभित्र र बाहिर साँटगाटमा भएको ओलीको भनाइ थियो । पार्टीभित्र देखिएको विवादले कम्युनिस्ट आन्दोलनको भविष्य खतरामा परेको उनले बताए । एमालेले लोकतन्त्र र संविधानको रक्षा गर्न लागेको उनको भनाइ थियो ।

पार्टीभित्रको विवादले विकासका प्रयासमा व्यवधान पुर्‍याएको पनि उनले बताए । देशलाई प्रतिगमनतर्फ धकेल्ने प्रयास भएको पनि उनको भनाइ थियो । केही समययता पार्टीमा अनुशासनहिनता, अराजकता हाबी भएको भन्दै ‌ओलीले विरोधी उत्साहित र कार्यकर्ता निराश भएका बताए ।

उपाध्यक्ष भीम रावलले पार्टीभित्रको विवाद समाधानका लागि गरिएको असार २७ को १० बुँदे कार्यान्वयन नभएको भन्दै स्थायी कमिटीमा फरकमत लेखेको भोलिपल्ट नै अध्यक्ष ओलीले पार्टीभित्र विवाद बाँकी नरहेको दाबी गरेका हुन् ।

एमालेको पालिका अधिवेशन कार्तिक ९ गतेका लागि तय गरिएको छ ।

प्रकाशित : कार्तिक ६, २०७८ १२:४५
पूरा पढ्नुहोस्
प्रतिक्रिया
पठाउनुहोस्
×