काठमाडौँ — नेकपा एमालेमा सात सदस्यीय सचिवालय निर्माणको प्रस्ताव गरिएको छ । यसअघि एमाले र माओवादी केन्द्र एकीकरण भएर बनेको नेकपामा पनि यस्तै प्रकारको सचिवालयको अवधारणा थियो ।
आइतबार ललितपुरको च्यासलमा भएको एमाले स्थायी कमिटीको बैठकमा संगठन विभागले अध्यक्षको नेतृत्वमा सात सदस्यीय सचिवालय निर्माणको प्रस्ताव गरेको हो । 'नेकपामा जस्तै सात सदस्यीय सचिवालयको प्रस्ताव आएको छ,' एक स्थायी कमिटी सदस्यले भने, 'महासचिवको नेतृत्वमा कार्यलय सम्बन्धी सचिवालय रहेको छ । तर विधानबाट पोलिटब्युरो संरचना हटाइएको छ ।'
त्यसैगरी प्रस्तावित विधानमा उपाध्यक्षको संख्या घटाएर सचिवको संख्या बढाइएको छ । 'उपाध्यक्षको संख्या तीनमा झारिएको छ,' उनले भने, 'सचिवको संख्या सात पुर्याइएको छ ।'
नवौं महाधिवेशनमा उपाध्यक्ष र सचिवको संख्या पाँच-पाँच रहेको थियो । उप-महासचिव भने २ जना रहने छन् । केन्द्रीय कमिटी भने २ सय २५ जनाको रहने प्रस्ताव गरिएको छ । एमालेमा केन्द्रीय कमिटीको एक तिहाई संख्याको पोलिटब्युरो, पोलिटब्युरोको एक तिहाई संख्याको स्थायी कमिटी बनाउने गरिएको छ ।
त्यसैगरी, राष्ट्रिय प्रतिनिधि परिषद् महाधिवेशनको प्रतिनिधिलाई बनाउने प्रस्ताव गरिएको छ ।
