एमालेको विधान महाधिवेशन सर्‍यो

शनिबार बसेको स्थायी कमिटी बैठकले विधान महाधिवेशन असोज १५ देखि १७ गतेका लागि सार्ने निर्णय गरेको महासचिव ईश्वर पोखरेलले जानकारी दिए । उनका अनुसार दस्तावेज तयारी लगायत काम नसकिएकोले महाधिवेशन सारिएको हो ।

विधान महाधिवेशन काठमाडौंमा हुने छ । त्यसको तयारीका लागि असोज ३ र ४ गते स्थायी कमिटी बैठक बस्ने पार्टी सचिव योगेश भट्टराईले जानकारी दिए । उनका अनुसार बैठकमा विधान महाधिवेशनमा प्रस्तुत हुने विधान संशोधनसम्बन्धी प्रस्ताव, राजनीतिक प्रतिवेदन, संगठनात्मक प्रतिवेदनहरु प्रस्तुत हुनेछन् । स्थायी समितिमा ती प्रतिवेदनमाथि छलफल गरी प्राप्त सुझावहरुलाई असोज ८ र ९ गते बस्ने केन्द्रीय कमिटी बैठकमा पेस हुने छ । केन्द्रीय कमिटी बैठकमा छलफल गरी ती दस्तावेजहरु विधान महाधिवेशनमा पेस गरिने सचिव भट्टराईले जनाए ।