बाढीपहिरो प्रभावितको उद्धार तथा राहतलाई प्रभावकारी बनाउन सरकारसँग विपक्षी गठबन्धनको माग- समाचार - कान्तिपुर समाचार
कान्तिपुर वेबसाईट
AdvertisementAdvertisement

बाढीपहिरो प्रभावितको उद्धार तथा राहतलाई प्रभावकारी बनाउन सरकारसँग विपक्षी गठबन्धनको माग

प्राकृतिक विपत्तिको सामना गर्ने पूर्वतयारी नगर्नु गैर जिम्मेवार : पाँच दल
कान्तिपुर संवाददाता

काठमाडौँ — विपक्षी गठबन्धनले बाढी, पहिरोबाट पीडित जनताको उद्धार तथा राहतका क्रियाकलापमा आ–आफ्ना स्थानबाट योगदान गर्न पार्टी कार्यकर्ता र संघसंस्थाहरुलाई आह्वान गरेका छन् ।

कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमकल दाहाल, एमाले वरिष्ठ नेता माधवकुमार नेपाल, जनता समाजवादी पार्टीका अध्यक्ष उपेन्द्र यादव र राष्ट्रिय जनमोर्चाका दुर्गा पौडेलले बिहीबार संयुक्त वक्तव्य जारी गर्दै यस्तो आह्वान गरेका हुन् ।

नेताहरुले बाढी–पहिरोबाट प्रभावितको उद्धार तथा राहतलाई प्रभावकारी बनाउन सरकारसँग माग गरेका छन् । ‘बाढी, पहिरो र डुबानबाट जनताको सुरक्षा गर्न, पीडित जनता र विस्थापितहरुका लागि तत्काल आवास, खाद्यान्न, मृतकका परिवारलाई सहयोग, घाइतेहरुको उपचार लगायतका उद्धार र राहतका काम प्रभावकारी रुपमा अगाडि बढाउन हामी नेपाल सरकारसँग माग गर्दछौं,’ विज्ञप्तिमा भनिएको छ, ‘इमान्दारी, तदारुकता र पारदर्शीरुपमा राज्यका सम्बन्धित सबै निकाय तथा साधन र स्रोतको पूर्ण परिचालन गरी विपद् व्यवस्थापनको कार्यलाई अघि बढाउन आग्रह गर्दछौं ।’

प्राकृतिक विपत्तिको सामना गर्ने कुनै पूर्व तयारी नगरी सरकारले गैर जिम्मेवारपन देखाएको गठबन्धनको ठहर छ ।

प्रकाशित : असार ३, २०७८ १४:१९
प्रतिक्रिया
पठाउनुहोस्

विपद् प्रतिकार्यका लागि गण्डकी सरकारले छुट्यायो ५ करोड

प्रतीक्षा काफ्ले

कास्की — गण्डकी प्रदेश सरकारले विपद् प्रतिकार्यका लागि ५ करोड रुपैयाँ छुट्याएको छ । बिहीबार बसेको गण्डकी प्रदेशस्तरीय प्रदेश विपद् व्यवस्थापन कार्य समितिको बैठकले प्रदेशस्तरीय विपद् कोषयमा तत्कालका लागि ५ करोड रुपैयाँ राख्ने निर्णय गरेको हो ।

बैठक मुख्यमन्त्री कृष्णचन्द्र नेपालीको अध्यक्षतमा बसेको थियो ।

प्रदेशका विभिन्न जिल्लामा भारी वर्षाका कारण क्षति भएकाले उद्धार, राहत र व्यवस्थापनको लागि उक्त रकम राख्ने निर्णय भएको सरकारका प्रवक्ता कुमार खड्काले जानकारी दिए ।

यस्तै, मुख्यमन्त्री नेपाली बिहीबार बाढी–पहिरोले पुर्‍याएको क्षतिको अवलोकनका लागि मनाङ जाने कार्यक्रम छ । गृहमन्त्रालयको समन्वयमा हेलिकोप्टरबाट राहत सामाग्रीसहित उनी मनाङ जान लागेको खड्काले बताए । मुख्यमन्त्री बहाली भएकै दिनमा भएको निर्णय अनुसार विपद् पूर्वतयारी तथा प्रतिकार्य योजना तत्काल निर्माण गरी कार्यान्यवनमा ल्याउन पनि उनले सबै जिल्लालाई निर्देशन दिएका छन् ।

प्रदेश सरकारले प्रदेशका ९ जिल्लाका लागि १०/१० लाख रुपैयाँ, मनाङ र मुस्ताङका लागि २/२ लाख रुपैयाँ यसअघि नै पठाइसकेको छ ।

प्रकाशित : असार ३, २०७८ १३:५०
पूरा पढ्नुहोस्
प्रतिक्रिया
पठाउनुहोस्
×