सांसदमाथिको सम्भावित कारबाही रोक्न आदेश माग गर्दै खनाल-नेपाल समूह सर्वोच्चमा- समाचार - कान्तिपुर समाचार
कान्तिपुर वेबसाईट
AdvertisementAdvertisement

सांसदमाथिको सम्भावित कारबाही रोक्न आदेश माग गर्दै खनाल-नेपाल समूह सर्वोच्चमा

कान्तिपुर संवाददाता

काठमाडौँ — निर्वाचित सांसदमाथि कारबाही गर्न लागिएको भन्दै नेकपा (एमाले)को झलनाथ खनाल-माधवकुमार नेपाल समूहले सर्वोच्च अदालतमा निवेदन बुझाएको छ ।

खनाल-नेपाल पक्षले सांसदमाथि कारबाही गर्न लागिएको भन्दै सर्वोच्चलाई प्रतिषेधको आदेश जारी गरीपाउँ भन्दै निवेदन दिएको हो ।

त्यस्तै, २०७५ जेठ २ गतेअघिकै नेकपा (एमाले) ब्युँताउने सर्वोच्चको २०७७ फागुन २३ गतेको आदेश कार्यान्वयन गरिपाउँ भन्ने पनि निवदेनमा माग गरिएको छ । २७ जना सांसदका हकमा त्यस्तो आदेश माग गरिएको हो । निवेदनमा नेकपा एमालेका अध्यक्ष तथा संसदीय दलका नेता केपी शर्मा ओली, महासचिव ईश्वर पोखरेल, निर्वाचन आयोग र सभामुख अग्निप्रसाद सापकोटालाई विपक्षी बनाइएको छ ।

निवेदन ३ बजेपछि आएको र अध्ययनकै क्रममा रहेकाले दर्ता भने नभएको सर्वोच्च अदालतले बताएको छ । सर्वोच्च अदालतको मुद्दा तथा रिट महाशाखाका सहरजिस्ट्रार बाबुराम दाहालले बुधबार निवेदन अध्ययन गर्न नभ्याइएकाले दर्ता नभएको बताए ।

निवेदन दर्ताका लागि माधवकुमार नेपाल, भीम रावल, घनश्याम भुसाल र सुरेन्द्र पाण्डेले सर्वोच्चमा निवेदन दिएका हुन् ।

नेपाल पक्षले कानुन व्यवसायी अधिवक्ता टीकाराम भट्टराईलगायतमार्फत सर्वोच्च अदालतमा निवेदन दर्ता गरेका हुन् ।

एमाले अध्यक्ष ओलीले बिनाकारण स्पष्टिकरण सोधेको र बाँकी कारबाही रोक्न भन्दै नेपालपक्ष अदालत गएको हो । ओलीले २७ सांसद्लाई मंगलबार पत्र पठाउँदै जुनसुकै बेला कडा कारबाही गर्नुपर्ने अवस्था आउने चेतावनी दिएका थिए ।

उनले नेपाल पक्षधर नेताहरूलाई एमालेकै नाम र सूर्य चिह्न प्रयोग गरेर किन नयाँ पार्टी खोलेको भन्दै प्रश्नसमेत गरेका थिए ।

प्रकाशित : वैशाख ८, २०७८ १७:३०
प्रतिक्रिया
पठाउनुहोस्

कसले जित्ला ओस्कारको 'उत्कृष्ट अन्तर्राष्ट्रिय फिचर फिल्म' ?

कान्तिपुर संवाददाता

काठमाडौँ — गत वर्ष ओस्कारले 'उत्कृष्ट विदेशी भाषाको फिल्म'को विधाको नाम परिवर्तन गर्‍यो । विधालाई नयाँ नाम दिइयो, 'उत्कृष्ट अन्तर्राष्ट्रिय फिचर फिल्म' । यो विधामा बोङ जो हु निर्देशित दक्षिण कोरियाली फिल्म 'प्यारासाइट'ले अवार्ड प्राप्त गर्‍यो । उत्कृष्ट फिल्मको ओस्कार अवार्ड जित्ने पहिलो गैरअंग्रेजी भाषी फिल्मको कीर्तिमान पनि यही फिल्मले कायम गर्‍यो ।

दर्शक र समीक्षकले रुचाएको यो फिल्मले विश्वभरबाट २ सय ५० मिलियन डलरको व्यापार गर्‍यो । अब भने एकेडेमीका सबै सदस्यले भोटिङ प्रक्रियामा सरिक हुन पाउने भएका छन् । यसअघि कुनै विशेष प्यानलले मात्र भोटिङ गर्न पाउँथे । यो विधाका दुई आधारभूत आवश्यकता उस्तै छन् । कुनै देशले एउटा मात्र फिल्म यो विधामा पठाउन पाउँछन् । अंग्रेजी भाषा न्यून प्रयोग भएको फिल्मले मात्र यो विधामा सहभागिता जनाउन पाउँछन् ।

गैरअंग्रेजी भाषाको फिल्मले ओस्कार जितेसँगै पछिल्लो समय यो विधाका फिल्ममेकरमा आस जागेको छ । यो वर्ष उत्कृष्ट अन्तर्राष्ट्रिय विधातर्फ पाँच फिल्म प्रतिस्पर्धामा छन् । डेनमार्कको 'एनोदर राउन्ड'लाई यो विधाको अवार्डको दाबेदार फिल्मको रुपमा चर्चा गरिँदै आएको छ । यो फिल्मले बाफ्टामा गैरअंग्रेजी भाषातर्फ उत्कष्ट फिल्मको अवार्ड पाएको थियो । थोमस भिन्टरवर्ग निर्देशिक फिल्ममा एक विद्यालयमा अध्यापन गराउने शिक्षक मार्टिनको कथा समेटिएको छ ।

हङकङको 'बेटर डेज' छोटो सूचनाको आधारमै बर्लिन फिल्म फेस्टिभलबाट निकालिएको थियो । चिनियाँ अधिकारीले फिल्मले देशको शिक्षण प्रणालीलाई गलत देखाइएको भन्दै मन पराएनन् । फिल्ममा विद्यालयमा हुने 'बुलिङ'ले एक पात्रको जीवन कष्टकर बन्छ भन्ने देखाइएको छ । रोमानियाको एउटा नाइटक्लबको आगलागीको कथा समेटिएको 'कलेक्टिभ' पनि यो विधाको प्रतिस्पर्धामा उत्रेको छ । यो अब्जरभेसनल डकुमेन्ट्री हो । यो विधामा डकुमेन्ट्री कम छन् । 'द म्यान हु सोल्ड हिज स्किन' र 'को वाडिस, आइडा' यो विधामा प्रतिस्पर्धाका लागि छन् । 'को वाडिस, आइडा' बाफ्टाको उत्कृष्ट निर्देशक र उत्कृष्ट फिल्मको विधामा मनोनयनमा परेको थियो ।

प्रकाशित : वैशाख ८, २०७८ १७:१४
पूरा पढ्नुहोस्
प्रतिक्रिया
पठाउनुहोस्
×