उपत्यकामा २४ घण्टामा थपिए ९४७ जना कोरोना संक्रमित - समाचार - कान्तिपुर समाचार

उपत्यकामा २४ घण्टामा थपिए ९४७ जना कोरोना संक्रमित 

कान्तिपुर संवाददाता

काठमाडौँ — पछिल्लो २४ घण्टामा काठमाडौं उपत्यकामा ९४७ जना कोरोना संक्रमित थपिएका छन् । 

स्वास्थ्य तथा जनसंख्या मन्त्रालयले मंगलबार दिएको जानकारीअनुसार २४ घण्टामा संक्रमित पुष्टि हुनेमा ४१० र ५३७ पुरुष रहेका छन् ।

मन्त्रालयका अनुसार काठमाडौंमा ६९२, भक्तपुरमा ६५ र ललितपुरमा १९० जनामा कोरोना संक्रमण पुष्टि भएको हो ।

देशभर मंगलबार संक्रमित पुष्टि हुनेमा १ हजार ७९० जना रहेका छन् । हालसम्म नेपालमा कोरोना संक्रमितको कुल संख्या २ लाख २४ हजार ७८ पुगेको छ । २४ घण्टामा २ हजार ७९१ जना कोरोना संक्रमणबाट निको भएर डिस्चार्ज भएका छन् । नेपालमा योसँगै निको हुनेको २ लाख ४ हजार ८५८ पुगेको छ ।

२४ घण्टामा कोरोना संक्रमणबाट २४ जनाको मृत्यु भएसँगै हालसम्म मृत्यु हुनेको संख्या १ हजार ३६१ पुगेको छ । मन्त्रालयका अनुसार हालसम्म पीसीआर विधिबाट १६ लाख ८१ हजार २९९ परीक्षणहरु गरिएका छन् ।

देशभरी सक्रिय संक्रमितको संख्या हालसम्म १७ हजार ८५९ छ भने क्वारेन्टाइनमा रहनेको संख्या ६२७ जना रहेका छन् ।

प्रकाशित : मंसिर ९, २०७७ १६:२९
प्रतिक्रिया
पठाउनुहोस्

वाग्मती प्रदेशमा कर्मचारी भर्ना सुरु

सुवास विडारी

मकवानपुर — वाग्मती प्रदेश सरकारले निजामती कर्मचारी भर्ना सुरु गरेको छ । देश संघीय संरचनामा गएसँगै पहिलो पटक प्रदेश लोकसेवा आयोगले स्थानीय तह र प्रदेशको दुईवटा मन्त्रालयका लागि सहायक चौथोस्तरको कर्मचारी माग गरिएको हो ।

आयोग गठन भएको एकवर्षपछि आयोगले चारसय ६९ जना कर्मचारीका लागि विज्ञापन आह्वान गरेको हो । प्रदेशतहमा २०७६ मंसिर २ गते आयोग गठन भएको थियो भने माघ ५ गते आयोगले पूर्णता पाएको थियो । आयोगमा एक अध्यक्षसहित दुईजना सदस्य रहेका छन् । ‘आयोगले प्रदेशको स्थानीय तह र मन्त्रालयहरुलाई रिक्त रहेको दरबन्दी पदपूर्ति र बढुवाका रिक्त सूची माग गरेका थियौं । सोही अनुरुप पहिलो पटक ४४ वटा स्थानीय तह र दुईवटा मन्त्रालयका लागि कर्मचारी माग गरिएको हो ।’ आयोगका अध्यक्ष सुरेशमान श्रेष्ठले आयोगले वार्षिक पदपूर्ति तालिका नै निर्माण गरेर आफ्नो कार्यक्रम सञ्चालन गरेको हो ।

आयोगले प्रदेशका ११९ वटा स्थानीय तहमध्ये ४४ वटा र प्रदेशको सातवटा मन्त्रालयमध्ये दुईवटाका लागि कर्मचारी माग गरेको हो । ४४ वटा स्थानीय तहका लागि चारसय ४५, प्रदेशको सामाजिक विकास मन्त्रालयका लागि २० जना र भौतिक पूर्वाधार विकास मन्त्रालयलका लागि २ जना कर्मचारी माग गरिएको हो । संघीय सरकारको निजामती सेवा ऐनमा भएको व्यवस्था अनुसार कर्मचारी पदपूर्ति सुरु गरिएको र सेवासुविधा सोही अनुसार हुने श्रेष्ठले बताए ।

‘प्रदेशले निजामती ऐन र सेवासुविधा सम्बन्धि कानुन निर्माण गरेर लागू गरेपछि सोही अनुसार हुनेछ ।’, उनले थपे । संघीय सरकारले वाग्मती प्रदेशका लागि तीन हजार सातसय ६४ कर्मचारी दरबन्दी स्वीकृत गरेको छ । हाल करिब एकहजार कर्मचारी प्रदेश तहमा रिक्त रहेको छ । ‘स्थानीय तहमा कति कर्मचारी आवश्यक छ भन्ने अझै टुंगो लागेको छैन । सवै स्थानीय तहबाट कर्मचारी विवरण आएपछि सोही अनुसार विज्ञापन गर्नेछौं ।’, श्रेष्ठले भने ।

प्रकाशित : मंसिर ९, २०७७ १६:२९
पूरा पढ्नुहोस्
प्रतिक्रिया
पठाउनुहोस्
×