अलपत्र र स्वदेश फर्किन नसक्नेलाई सरकारी खर्चमा उद्धार गरिने
काठमाडौँ — सरकारले विदेशमा विदेशमा अलपत्र परेका, स्वदेश फर्किन सक्ने कुनै पनि आधार नभएका नागरिकहरुलाई सरकारी खर्चमा उद्धार गर्ने भएको छ ।
संस्कृति पर्यटन तथा नागरिक उड्डयनमन्त्री योगेश भट्टराईले विदेशमा अलपत्र परेका,फर्कने कुनै आधार नभएका व्यक्तिहरुलाई श्रम कल्याणकारी कोषबाट सरकारले टिकट काटेर ल्याउने बताएका हुन् । उनले भने,' त्यस्ता नागरिकहरुलाई सरकारले आफैं टिकट काटेर ल्याउने, यहाँ आएर होटल क्वारेन्टाइन र पीसीआर खर्च पनि सरकारले व्यहोर्छ ।'
उनले त्यसका लागि श्रम मन्त्रालयले सम्बन्धित देशको कूटनीतिक नियोगसँग समन्वय गरेर लिष्ट फाइनल गर्नुपर्ने बताए । यस्तै उनले कुनै कम्पनीले आफ्नो कम्पनीबाट मान्छे पठाउँछ भने उनीहरुले टिकट पनि काट्नुपर्ने बताए । त्यस्ता कम्पनीहरुले नै क्वारेन्टाइनमा बस्दा लाग्ने खर्च व्यहोर्नुपर्ने बताए ।
'पीसीआर परीक्षण गरी पठाउँछु भन्यो भने पनि सरकारले त्यही अनुसार पनि उद्धार गर्छ,' मन्त्री भट्टराईले भने ।
यसैबीच मन्त्री भट्टराईले पीसीआर अनिवार्य गरिएका देशहरुबाट कोरोना पोजिटिभ भएको वा परीक्षण नगरेको व्यक्तिलाई ल्याइए सम्बन्धित एयरलाइन्स कम्पनीले सबै यात्रुहरुको क्वारेन्टाइन खर्च व्यहोर्नुपर्ने बताएका छन् ।
नेपाल घुम्न आउने पर्यटकहरुका लागि नभएर विदेशमा अलपत्र परेका नेपाली, नेपाल आउनै पर्ने कूटनीतिक नियोगका पदाधिकारी, विकास साझेदार संस्थाका कर्मचारीहरु मात्रै आउन पाउने उनले बताए । परिस्थिति अनुकुल भएपछि अन्य देशहरुको समेत अवस्था हेरेर नियमित उडान सुरु हुने उनले बताए ।
यो पनि पढ्नुहोस्ः