गणतान्त्रिक व्यवस्थामा पनि पञ्‍चायत र राजतन्त्रकै कार्यशैली छ : सांसद भुसाल- समाचार - कान्तिपुर समाचार

गणतान्त्रिक व्यवस्थामा पनि पञ्‍चायत र राजतन्त्रकै कार्यशैली छ : सांसद भुसाल

कान्तिपुर संवाददाता

काठमाडौँ — सत्तारुढ नेकपाकी सांसद पम्फा भुसालले गणतान्त्रिक सरकारको कार्यशैली पञ्चायत र राजतन्त्रको जस्तो भएको बताएकी छन् । आइतबारको प्रतिनिधिसभा बैठकमा आगामी आर्थिक वर्षको बजेटमाथि छलफलमा सहभागी हुँदै उनले सांसदले बोलेका कुरा बजेटमा नसमेट्ने राजतन्त्र र पञ्चायतको शैली र विधि अहिले पनि यथावत रहेको बताइन् । 

सांसदहरूले बजेटमाथि बोलेका कुरा सरकारले नसमेट्ने गरेकाले अर्थहीन छलफल संसदमा हुने गरेको भुसालको भनाइ थियो । सरकारले सांसदहरूले नीति तथा कार्यक्रम र बजेटमाथि बोलेका कुरा र दिएका सुझाव समेट्ने गरेको छैन । सत्तारुढ र प्रतिपक्षी दलले दिएका सुझाव नसमेट्ने परम्परा अन्त्य गर्दै सकारात्मक सुझाव समेट्नुपर्ने भुसालको सुझाव थियो ।

'बजेटमाथि छलफल गर्दा बोलौं कि नबोलौं लाग्छ । धेरै ठूलो राजनीतिक परिवर्तन गर्दा पनि कार्यशैली र विधि राजतन्त्र र पञ्चायतको जस्तै छ । बजेटमा एक रुपैयाँ तलमाथि हुन्न, नीति तथा कार्यक्रममा कमा, फुलस्टप परिवर्तन हुन्न,' भुसालले भनिन्, 'बोलेर सुधार हुन्न । यहाँ बोल्नु बौद्धिक विलाशजस्तो हुन्छ । आफुले बोलेकोमा सुधार हुन्न भने बोल्नुको अर्थ छैन ।'

परम्परागत संसदीय व्यवस्था जस्तो वर्तमान संसदीय व्यवस्थालाई नसोच्न सरकारलाई भुसालको सुझाव थियो ।

बजेटले कोरोनालाई लक्षित योजना ल्याएको भन्दै उनले त्यसलाई सकारात्मक रूपमा लिनुपर्ने बताइन् । कोरोनाबाट प्रभावित जनताका लागि राहतका कार्यक्रम ल्यानु सकारात्मक भएको, रोजगारीका प्रस्ताव आउनु सकारात्मक हुँदा पनि कार्यान्वयनको पाटो चुनौतीपूर्ण रहेको भुसालको भनाइ थियो ।

भूमि बैंक केही धनाढ्यको पक्षमा आएको भुसालको आशंका थियो । त्यस्तै, सामुदायिक विद्यालयको शैक्षिक सुधार गर्न निजी विद्यालयको जिम्मा दिने कार्यक्रमप्रति भुसालले आक्रोश व्यक्त गरिन् । त्यो कार्यक्रम फिर्ता लिन उनले सरकारलाई सुझाव दिइन् ।

मुलुकमा विद्युतीय सवारी साधनको प्रयोगमा बढावा दिनुपर्ने भन्दै केही व्यक्तिले ल्याउने महंगा र विलासी सवारीलाई हेरेर सबै प्रकारका विद्युतीय सवारीमा कर लगाउनु ठीक नभएको उनको भनाइ थियो ।

प्रकाशित : जेष्ठ १८, २०७७ १४:३३
प्रतिक्रिया
पठाउनुहोस्

नेपालबाट फर्किएकालाई भारत प्रवेशमा रोक

भारतले नपठाउनू भनेको छ  : प्रहरी
पर्वत पाेर्तेल

काँकडभिट्टा — भारतले मेचीपारि अलपत्र नेपालीलाई ‘चोर बाटो’ बाट पठाइरहेको छ । तर, नेपालबाट जाने भारतीय नागरिकलाई भने प्रवेशमा रोक लगाएको छ । दुई दिनअघि प्रहरीको सहयोगमा १७ भारतीयलाई मेचीपारि पठाउन लागिएको थियो । तर, पानीट्यांकीमा रहेका प्रहरीले प्रवेश नदिएपछि ती पुनः नेपाल फर्किए ।

इलाका प्रहरी कार्यालय काँकडभिट्टाले तीन दिनअघि १७ जना भारतीयलाई प्रवेश गराउन पानीट्यांकीको स्थानीय प्रशासनँग आग्रह गरेको थियो ।

भारतले आफ्नै नागरिकलाई प्रवेशमा रोक लगाएपछि पूर्वी नाका काँकडभिट्टामा भीड जम्मा भएको छ । इलाका प्रहरी कार्यालय काँकडभिट्टाका डीएसपी राजेन्द्र पोख्रेलले भारतीय नागरिकको भीड बढ्न थाल्दा नाकामा समस्या पैदा भएको बताए । ‘भारतीयहरुको भीड बढ्याबढ्यै छ’, उनले भने, ‘भारतीय सुरक्षा संयन्त्रले तत्काल प्रवेश दिन नसकिने भनेको छ ।’

डीएसपी पोख्रेलका अनुसार भारतको पश्चिम बंगाल राज्य सरकारले क्वारेन्टाइनलगायतका पूर्वाधार निर्माण नभएको भन्दै तत्काल आफ्ना नागरिकलाई प्रवेश गराउन नसकिने भएकाले नेपालतिरै रोकेर राखिदिन आग्रह गरेको छ । केही समयअघिको आँधीका कारण बंगालमा भौतिक संरचनामा ठूलो क्षति पुगेको छ । डीएसपी पोख्रेलले भने,‘भारतले मान्छे नपठाउनु भनेको छ, तर भारत जान पाइन्छ भनेर नाकामा भारतीयहरुको भीड सुरु भइसकेको छ ।’ भारतले आफ्नो देशमा रहेका नेपालीहरुलाई भने दैनिक चोर नाकाबाट नेपाल पठाइरहेको छ ।

डीएसपी पोख्रेलले भारतीयहरुको भीडले काँकडभिट्टा बसपार्क क्षेत्र अस्तव्यस्त बन्दै गएको बताए । उनीहरुलाई सुरक्षित ढंगले राख्ने पूर्वाधारसमेत छैन । ‘भारतीयहरुलाई राख्न मेचीनगरले सेल्टर निर्माण गर्न जरुरी देखिन्छ’, डीएसपीले भने, ‘नत्र बजार नै अस्तव्यस्त हुने देखिन्छ ।’

प्रहरी स्रोतका अनुसार नेपालका विभिन्न इँटा कारखानामा कार्यरत २० हजारभन्दा बढी भारतीय नागरिक पूर्वी नाकाबाट भारत फर्कंदैछन् । वर्षायाम सुरु भएसँगै इँटाभट्टाहरु धमाधम बन्द हुन थालेपछि ती श्रमिकहरु घर फर्किंदै छन् । तर, भारतले प्रवेशमा रोक लगाइरहेका कारण समस्या भएको हो । ‘२० हजार भारतीय आएर थुप्रिए भने के होला अवस्था’, डीएसपीले भने, ‘यसवारे स्थानीय पालिका र प्रदेश सरकारको ध्यान जान जरुरी छ ।’

काँकडभिट्टा बसपार्क क्षेत्रमा अहिले पनि ३ सय जति भारतीय छन् । उनीहरु अधिकांश इँटा कारखानाका श्रमिक छन् ।

प्रकाशित : जेष्ठ १८, २०७७ १४:०६
पूरा पढ्नुहोस्
प्रतिक्रिया
पठाउनुहोस्
×