कान्तिपुर वेबसाईट
AdvertisementAdvertisement

स्वास्थ्य सामग्री खरिदमा अख्तियारले थाल्यो छानबिन 

बिहीबार नै स्वास्थ्य सेवा विभागका महानिर्देशक महेन्द्र श्रेष्ठलाई डाकेर सोधपुछ
कृष्ण ज्ञवाली, स्वरूप आचार्य

काठमाडौँ — अख्तियार दुरुपयोग अनुसन्धान आयोगले स्वास्थ्य सामग्री खरिदमा भएको अनियमितता छानबिनका क्रममा स्वास्थ्य सेवा विभागका महानिर्देशक महेन्द्र श्रेष्ठसँग सोधपुछ गरेको छ । बिहीबारदेखि उजुरीमाथि छानबिन थालेको अख्तियारले दिउँसो श्रेष्ठसँग अनौपचारिक रुपमा बयान लिएको हो । 

‘यो उजुरीमाथिको प्रारम्भिक छानबिन हो, त्यसैले बयान भन्ने शब्द प्रयोग नगरौं, हामीले उहाँसँग सोधपुछ गरेको हो’ अख्तियार उच्च स्रोतले कान्तिपुरसित भन्यो, ‘उहाँले आफ्ना कुरा बताउनुभयो । हामीले सुन्यौं । उजुरीका साथ प्राप्त प्रमाण हेछौं । मन्त्रालयबाट पनि केही कागजात पाइसकेका छौं ।’


श्रेष्ठले अख्तियारमा उपस्थित भएर बयान दिएको विषयलाई अख्तियारको सुरक्षास्रोतले पनि पुष्टि गर्‍यो । सुरक्षास्रोतका अनुसार विभागको गाडीमा अख्तियार पुगेका उनी केही घण्टा बसेर बाहिरिएका थिए । उक्त स्रोतले पनि उजुरी प्रारम्भिक चरणमै भएको पुष्टि गर्‍यो । उसले भन्यो, ‘स्वास्थ्य मन्त्रालय हेर्ने अख्तियारको महाशाखाले नै छानबिन अघि बढाएकाले यो विषय प्रारम्भिक हो भन्ने बुझ्नुपर्छ ।’


अख्तियारका प्रवक्ता प्रदीप कोइरालाले अनुसन्धानको चरणमा रहेको विषय प्रवक्ताको जानकारीमा नहुने भन्दै केही प्रतिक्रिया दिन नमिल्ने बताए । ‘अख्तियारको नियमित काम रोकिएको छैन, अनुसन्धानको विषय मलाई नै थाह छैन, कसरी तपाईंलाई भन्नु’उनले भने, ‘त्यसमाथि म आज दिनभर बाहिरतिर थिएँ ।’


यी पनि

- सम्पादकीय : स्वास्थ्यमन्त्री र उपप्रधानमन्त्रीको भूमिकामाथि छानबिन होस्


- मेडिकल उपकरण खरिद प्रकरण : भ्रष्टाचारको कसुर आकर्षित होला कि नहोला ?


- सम्झौताभन्दा २५ हजार बढी किट ल्याएपछि भन्सारमै रोकिएको खुलासा


- सम्झौता रद्द गर्ने, कारवाहीबाट जोगिने ?


- सिंगापुरको विवादास्पद कम्पनीमार्फत स्वास्थ्य सामग्री किनेको खुलासा


अख्तियार स्रोतका अनुसार लकडाउनका कारण कुनै पनि उजुरी चिठी वा अन्य पत्राचारको रुपमा ‘हार्डकपी’मा दर्ता भएको छैन । बुधबारमात्रै विवेकशील नेपाली दलले अख्तियारमा इमेलबाट उजुरी पठाएको थियो । त्यो लगायत अख्तियारले विभिन्न डिजिटल माध्यमबाट प्राप्त उजुरी बिहीबार बिहान संकलन भएको थियो । स्रोतले भन्यो, ‘आयोगको बैठक बसिसकेपछि केही महत्वपूर्ण महाशाखाका प्रमुखहरुलाई पनि बोलाइएको हो ।’


कोरोना भाइरस (कोभिड–१९) संक्रमण निययन्त्रणका लागि अत्यावश्यक स्वास्थ्य सामग्री खरिदमा भएको अनियमितता भएपछि बुधबार स्वास्थ्य मन्त्रालयले खरिद सम्झौता एकाएक रद्द गरेको थियो । बजारमूल्य भन्दा महँगोमा खरिद गरेको, गुणस्तरहीन र मापदण्डमा नपरेका किट खरिद भएको अनि सेटिङका आधारमा खरिद भएको खुलेपछि स्वास्थ्यमन्त्री भानुभक्त ढकाल र कोरोना नियन्त्रणसम्बन्धी उच्चस्तरीय समन्वय समितिका संयोजक एवं उपप्रधान, रक्षामन्त्री ईश्वर पोखरेलकै भूमिकामाथि प्रश्न उठेको हो ।

अख्तियारको प्रारम्भिक छानबिन बढीमा १/२ दिनमा टुंग्याउन सकिन्छ । प्रारम्भिक छानबिनबाट अनियमितता भएको पुष्टि भए अख्तियारले अनुसन्धान अधिकृत तोकेर विस्तृत अनुसन्धान सुरु गर्नुपर्ने नियम छ ।


प्रकाशित : चैत्र २०, २०७६ १६:५३
प्रतिक्रिया
पठाउनुहोस्

क्‍वारेन्टाइनमा बस्नेहरु धमाधम घर फर्किंदै

चारवटा स्थानीय तहबाट ५६ जना घरफिर्ता
आश गुरुङ

लमजुङ — घरमा बसेको समेत गरी १४ दिन क्वारेन्टाइनमा बिताएकाहरु स्वास्थ्य परीक्षणपछि धमाधम घर फर्किन थालेका छन् । कोरोना (कोभिड १९) संक्रमित मुलुक र भारतबाट आएकाहरु जोखिममा रहेको भन्दै उनीहरुलाई राख्न स्थानीय तहले क्वारेन्टाइन बनाएको थियो । 

विदेशबाट आएर पनि घर गएकाहरुलाई खोजी खोजी ल्याएर परिवारलाई समेत क्वारेन्टाइनमा राखिएको थियो । क्वारेन्टाइनको समयअवधि (घरमा बसेका समेत गरी) १४ दिन पूरा भएपछि विदेशबाट आएकाहरु परिवारका साथ घर फर्केको क्व्होलासोंथर गाउँपालिका अध्यक्ष प्रेमबहादुर घलेले बताए ।

लमजुङका ८ वटा स्थानीय तहमध्ये ४ वटा स्थानीय तहमा बसेका ५६ जना घर फर्केका छन् । यसअघि स्वास्थ्य जाँच गराएर क्वारेन्टाइनमा बसाएकाहरुलाई पुनः स्वास्थ्य परीक्षण गरी घर फर्काइएको हो ।

प्रमुख जिल्ला अधिकारी लक्षमणबहादुर खड्काका अनुसार चैत ६ गते यूएईको शारजाहबाट धादिङका कोरोना संक्रमित युवकसंगै एयर अरेबियाको जी ९५३७ को फ्लाइटमा आएकामध्ये ३ जनाको स्वाब परीक्षण गर्दा ‘नेगेटिभ’ देखिएपछि यी तिनैजना र उनका परिवारसमेत घर फर्केका छन् ।

क्व्होलासोंथर गाउँपालिकाका प्रमुख प्रशासकीय अधिकृत पिताम्बर सारुका अनुसार गाउँपालिकाभर क्वारेन्टाइनमा बसेकामध्ये ४३ जना क्वारेन्टाइनमा बस्नुपर्ने अवधि १४ दिन पूरा गरी घर फर्केका छन् । बिहीबारमात्रै ३० जना घर फर्किएको र यसअघि बुधबार ८ जना र मंगलबार ५ जना घर फर्किएको उनले बताए ।

बिहीबार क्व्होलासोंथर ९, टक्सारको थल्जुकन्या आधारभूत विद्यालयमा दुबईबाट आएर क्वारेन्टाइन बसेका लोकबहादुर विकसहितको ८ जनाको परिवार घर फर्केको उनले बताए । ४ सय ४४ वेडको क्वारेन्टाइन निर्माण गरिएको क्व्होलासोंथरमा अब १३ जनामात्रै क्वारेन्टाइनमा छन् ।

बेंसीसहर नगरपालिकाभित्र निर्माण गरिएका क्वारेन्टाइनबाट ६ जना घर फर्किएको नगरप्रमुख गुमानसिंह अर्यालले बताए । सहजीस्थित सहरी विकास कार्यालयको भवनमा बसेका २ जना १४ दिन पूरा गरी घर फर्केका छन् । बेंसीसहर नगरपालिकाले १ सय ६० बेड क्षमताको क्वारेन्टाइन बनाएकोमा क्वारेन्टाइनमा बस्नेको संख्या १० जना रहेको छ ।

मध्यनेपाल नगरपालिकाबाट ५ जना क्वारेन्टाइनबाट फर्केका छन् । नगरपालिकाका प्रमुख रमेशकुमार पाण्डेका अनुसार क्वारेन्टाइनमा बस्नुपर्ने समय पूरा भएपछि स्वास्थ्यकर्मीले स्वास्थ्य जाँच गराएर उनीहरुलाई घर पठाइएको हो । मध्यनेपाल ७ को इशानेश्वर क्याम्पसमा बनाइएको क्वारेन्टाइनमा बसेका ५ जना बाहिरिएका छन् । उनीहरु भारतबाट आएका स्थानीय हुन् । क्वारेन्टाइनमा अब ५ जना रहेको उनले बताए । नगरपालिकाले विभिन्न वडामा गरेर ४० बेडको क्वारेन्टाइन बनाएको छ ।

मर्स्याङदी गाउापालिका ६ को चन्द्रोदय मावि बाहुनडााडामा बनाइएको क्वारेन्टाइनमा बसेका २ जना घर फर्केका छन् । भारतबाट आएका उनीहरुको क्वारेन्टाइन बस्नुपर्ने समय सकिएपछि घर फिर्ता भएको गाउापालिका अध्यक्ष अध्यक्ष अर्जुन गुरुङले बताए । गाउापालिकाले ६९ बेड क्षमताको क्वारेन्टाइन बनाएकोमा अहिले १८ जना क्वारेन्टाइनमा छन् ।

क्वीक रेस्पोन्स टीम (क्युआरटी) का संयोजक सहायक प्रमुख जिल्ला अधिकारी अनिलकुमार शाहीका अनुसार घर आएको समयसमेत गरी १४ दिन क्वारेन्टाइन पुगेकाहरुलाई स्थानीय तहले स्वास्थ्य जााच गराएर घर फर्किने वातावरण बनाएको छ ।

प्रकाशित : चैत्र २०, २०७६ १६:५०
पूरा पढ्नुहोस्
प्रतिक्रिया
पठाउनुहोस्
×