प्रहरी कार्यालयबाटै चिनियाँ नागरिकको म्याद थप
काठमाडौँ — प्रहरीले सोमबार पक्राउ परेका १२२ चिनियाँ नागरिकलाई प्रहरी कार्यालयबाटै म्याद थप गरेको छ ।
महानगरीय प्रहरी परिसरका आयुक्त डीआईजी विश्वराज पाेखरेलका अनुसार काठमाण्डाै परिसरबाट ८४ र महाराजगञ्ज वृत्तबाट ३८ जनालाई ५ दिनको म्याद थपेको हाे । अनुसन्धानका
क्रममा प्रहरीमाथि अभद्र व्यवहार गरेको आरोपमा उनीहरुलाई म्याद थप गरिएकाे हाे ।
साेमबार प्रहरीले १२२ जनालाई पक्राउ गरेकाेमा परिसरमा ४४ जना, दरबारमार्ग वृत्तमा १४, महाराजगञ्ज प्रहरी वृत्तमा ३८ जना, साेह्रखुट्टे प्रहरी वृत्तमा ११ र बालाजु प्रहरी वृत्तमा १५ जनालाई राखिएकाे थियाे ।
म्याद थपका लागि सरकारी वकिलको कार्यालय काठमाडाैं र जिल्ला अदालत काठमाडाैंकाे संयन्त्र प्रहरी कार्यालयमै पुगेकाे थियाे । भाषा समस्या र पक्राउ परेका आरोपितको संख्या धेरै भएका कारणले उनीहरुलाई अदालतमा उपस्थित गराउन समस्या भएकाले प्रहरी कार्यालयमै जिल्ला अदालत र जिल्ला सरकारी वकिलको कार्यालयको समन्वयमा म्याद थप गरिएकाे हाे ।
सरकारले नेपालमा बसेर गैरकानुनी गतिविधिमा संलग्न चिनियाँ नागरिकलाई देश निकाला गर्ने तयारी गरेकाे छ । नेपालमा बसेर गैरकानुनी गतिविधि गरेको अभियोगमा पक्राउ परेका १ सय २२ चिनियाँ नागरिकलाई अध्यागमन विभागले देशबाट निष्कासनकाे तयारी अघि बढाएको छ ।
प्रकाशित : पुस ८, २०७६ १५:०२