दैनिक मजदुरी गर्ने तथा विपन्न वर्गका नगरवासीलाई लक्षित गर्दै रामग्राम नगरपालिकाले चोकचोकमा आगो ताप्न दाउरा उपलब्ध गराएको छ।
परासी — दिनभर हुस्सु लाग्ने र जाडो बढ्न थालेपछि पश्चिम नवलपरासीमा रामग्राम नगरपालिकाले चोकचोकमा दाउरा वितरण गरेको छ ।
जाडोको कारण जनजीवन प्रभावित हुँदा कामका लागि घर बाहिर हिँड्नुपर्ने नगरवासीका लागि आगो ताप्न दाउरा वितरण गरिएको हो । नगरको मुख्य चोक, बजार क्षेत्र र मानिसको भिडभाड हुने स्थानमा आगो ताप्नका लागि निःशुल्क दाउरा वितरण गरिएको रामग्राम नगरपालिकाका प्रमुख धनपत यादवले बताए ।
सार्वजनिक स्थानमा आगो ताप्न पाउँदा दैनिक मजदुरी गर्ने र विपन्न वर्गका स्थानीयलाई सहज हुने भएकाले नगरको १८ वटा वडाको सार्वजनिक स्थानमा दाउरा वितरण गरेको छ । स्थानीय विपद् व्यवस्थापन समितिको बैठकले चोकचोकमा दाउरा वितरण गर्ने, विपन्न नागरिकलाई न्यानो कपडा प्रदान गर्ने निर्णय गरेपछि काम सुरु गरिएको हो । रामग्राम नगरपालिकाले अघिल्लो वर्ष पनि आगो ताप्न दाउरा वितरण गरेको थियो ।
पूर्वी र पश्चिम नवलपरासीमा शीतलहर बढेको छ । जसका कारण मुख्य राजमार्गमा हुस्सुले गर्दा सवारीसाधनले दिउँसै बत्ती बालेर हिँड्नुपर्ने बाध्यता छ । जाडो छल्नका लागि सर्वसाधारण चिया पसल र चोकमा आगो तापेर बस्ने रहेका छन् ।
