विराटनगर — बिहीबार हुने निर्वाचनलाई लक्षित गर्दै कोशी प्रदेशमा सुरक्षा व्यवस्था कडा बनाइएको छ । सम्भावित जोखिमका आधारमा प्रदेशका सयौँ मतदान स्थललाई अति संवेदनशील सूचीमा राख्दै सुरक्षा रणनीति थप चुस्त पारिएको प्रदेशको सुरक्षा श्रोतले जनाएको छ । 

कोशी प्रदेश प्रहरी प्रमुख डीआईजी विनोद घिमिरेका अनुसार प्रदेशभर १ हजार ९ सय ७ मतदान स्थलमध्ये ४ सय ३९ मतदान स्थल अति संवेदनशील सूचीमा छन् । ती मतदान स्थलअन्तर्गत ४ हजार २ सय ७० मतदान केन्द्र छन् । जसमध्ये १ हजार १६ केन्द्र उच्च जोखिमको सूचीमा छन् ।

विगतका घटनाको समीक्षा, अन्तर्राष्ट्रिय सीमा नजिकको अवस्था, मतदाता संख्या, राजनीतिक गतिविधिको तीव्रता, भौगोलिक दुर्गमता तथा सम्भावित जोखिमको विश्लेषणका आधारमा सुरक्षा वर्गीकरण गरिएको डीआईजी घिमिरेले जनाएका छन् । 

सुरक्षा स्रोतका अनुसार ८ सय २१ मतदान स्थल (१ हजार ८ सय ६९ केन्द्र) संवेदनशील र ६ सय ४७ मतदान स्थल (१ हजार ३ सय ८५ केन्द्र) सामान्य सूचीमा राखिएको छ । 

निर्वाचनलाई सुरक्षित र व्यवस्थित बनाउन तीन तहको सुरक्षा घेरा लागू गरिएको छ । पहिलो घेरामा नेपाल प्रहरी तथा निर्वाचन प्रहरी, दोस्रो घेरामा सशस्त्र प्रहरी बल तथा तेस्रो तथा बाहिरी घेरामा नेपाली सेनाको तैनाथ रहने छ । 

कोशीमा करिब ५० हजार सुरक्षाकर्मी परिचालन गरिएको छ । जसमा नेपाल प्रहरी १२ हजार छन् भने निर्वाचन प्रहरीको संख्या २५ हजार हाराहारी छ । सशस्त्र र नेपाली सेना पनि करिब १० हजार हाराहारीमा परिचालन भएका छन् । सबै मतदान केन्द्रहरूमा सुरक्षाकर्मी परिचालन भइसकेका छन् ।

कोशीका १४ जिल्लामा २८ निर्वाचन क्षेत्र रहेका छन् । मोरङमा सबैभन्दा बढी ६, झापामा ५ र सुनसरीमा ४ क्षेत्र छन् ।  इलाम र उदयपुरमा २/२ तथा ताप्लेजुङ, पाँचथर, धनकुटा, तेह्रथुम, संखुवासभा, भोजपुर, सोलुखुम्बु, खोटाङ र ओखलढुंगामा समान १/१ निर्वाचन क्षेत्र छन् । 

कोशीमा चुनावी सुरक्षा अनुगमन र समन्वयका लागि नेपाल प्रहरीका तीन जना प्रहरी वरिष्ठ उपरीक्षकहरू (एसएसपी) परिचालन गरिएको छ । मोरङ–सुनसरी क्षेत्रमा ज्ञानेन्द्र फुयाँल, झापा–इलाममा गोविन्द अधिकारी तथा उदयपुर–खोटाङ क्षेत्रमा योगेन्द्रसिंह थापा खटिएका छन् । 

कोशी प्रदेशमा कुल ३५ लाख ७४ हजार ३ सय १० मतदाता छन् । जसमध्ये १८ लाख २८ हजार २ सय १३ पुरुष, १७ लाख ४६ हजार ७३ महिला र २४ जना अन्य मतदाता छन् ।