विराटनगर — प्रदेश १ मा आइतबार ९ सय ७८ को परीक्षण गरिँदा ४ सय १७ जना संक्रमित देखिएका छन् । जुन ४२.६४ प्रतिशत पोजिटिभिटी दर हो । योसँगै प्रदेशमा संक्रमित हुनेको संख्या २ हजार ७ सय ६९ पुगेको सामाजिक विकास मन्त्रालयले जनाएको छ ।

प्रदेशमा थपिएकामध्ये २ सय ६२ अर्थात् ६२.८३ प्रतिशत मोरङको भएको मन्त्रालयले जनाएको छ । मन्त्रालयका अनुसार यीमध्ये पनि २ सय (झन्डै ४८ प्रतिशत) विराटनगरका हुन् । 

हाल संक्रमित भएकामध्ये १ हजार ४ सय ६० मोरङका, ५ सय ५ सुनसरीका र ४ सय ४७ झापाका भएको मन्त्रालयले जनाएको छ । मन्त्रालयका अनुसार आइतबार दुई महिला र तीन पुरुषको मृत्यु भएको छ । तीमध्ये दुई मोरङको, दुई सुनसरीको र एक ताप्लेजुङको भएको मन्त्रालयले जनाएको छ ।