विराटनगर — प्रदेश १ का मुख्यमन्त्री शेरधन राईले संविधान र संघीयता कमजोर बनाउने उद्देश्यले आफूविरुद्ध अविश्वासको प्रस्ताव ल्याइएको आरोप लगाएका छन् ।

प्रदेश सरकारको तीन वर्ष पूरा भएको अवसरमा आयोजित कार्यक्रममा सोमबार मुख्यमन्त्री राईले प्रदेशवासीमा जागेको उत्साहमा तातोपानी खन्याउँदै विकास र समृद्धिको चाहना पूरा हुन नदिने उद्देश्यले अविश्वासको प्रस्ताव आएको बताएका हुन् ।

सत्तापक्षकै सांसदहरूले प्रदेशसभा अवरुद्ध गरिरहेका बेला मुख्यमन्त्री राईले प्रदेशको राजनीतिक अन्योल चाँडै अन्त्य गर्ने दाबी गरे । ‘प्रदेशमा अस्थिरता र अराजकता सिर्जना गर्न अविश्वासको प्रस्ताव ल्याएर अन्योल सिर्जना गर्ने प्रयास भएको छ,’ उनले भने, ‘प्रदेशमा देखिएको राजनीतिक अन्योल चाँडै कानुनी र वैधानिक रूपमा अन्त्य गर्छौं ।’ सत्तारूढ दलभित्रैबाट मुलुकलाई अस्थिरता र अराजकतातर्फ धकेल्न खोजेकाले प्रधानमन्त्री केपी शर्मा ओलीले ताजा जनादेशका लागि निर्वाचन घोषणा गरेको उनले बताए ।

‘सरकार ढालेर प्रधानमन्त्री, राष्ट्रपति, प्रदेशका मुख्यमन्त्री, प्रदेश प्रमुखहरूलाई अपदस्थ गरेर विगतझैं ६/९/१५/१८ महिने सरकार बनाउने र ढाल्ने खेल सुरु भयो,’ उनले भने, ‘त्यो फोहोरी खेल समाप्त पार्न प्रधानमन्त्रीज्यूले लोकतान्त्रिक कदमबाट मुलुकलाई ताजा जनादेशका लागि निर्वाचन घोषणा गर्नुभएको छ ।’