काठमाडौँ — गण्डकी प्रदेशका आर्थिक मामिला मन्त्री टकराज गुरुङले गण्डकीलाई नेपालको आधुनिक पर्यटनको जननीका रूपमा प्रस्तुत गर्दै प्रदेशको पर्यटन विकास र योजनाबारे जानकारी दिएका छन् । कान्तिपुर मिडिया ग्रुपले बुधबार आयोजना गरेको ‘गन्तव्य गण्डकी’ कार्यक्रमको पहिलो सत्र ‘राजनीति र पर्यटन नीति’मा बोल्दै उनले गण्डकी प्रदेशको प्राथमिकतामा ‘एग्रो-टुरिजम’ रहेको धारणा राखे ।
मन्त्री गुरुङले कृषि र पर्यटनको प्रवर्द्धनका लागि ‘एग्रो-टुरिजम’लाई प्रदेशको मुख्य प्राथमिकतामा राखिएको बताए ।
उनका अनुसार गण्डकी प्रदेशको पहिलो प्राथमिकता क्षेत्र कृषि हो र यसलाई दोस्रो प्राथमिकतामा रहेको पर्यटनसँग जोडेर दिगो विकासका कार्यक्रम अघि बढाइएका छन् । ‘भुजुङ खोलाको ट्राउट, लोकल कुखुरा, यहाँका फलफूल बगैँचा र रैथाने बालीनालीजस्ता कृषिका विविध पक्षलाई पर्यटनसँग जोडिरहेका छौँ,’ उनले भने ।
सांस्कृतिक तथा व्यापार मेलालाई प्रवर्द्धन गर्दै जातजाति र बाजागाजालाई आर्थिक रूपले बजारीकरण गर्न प्रदेश सरकारले सहयोग गरिरहेको पनि उनले बताए ।
साहसिक खेल, कोसेली घर, र घरबास कार्यक्रमलाई तालिम प्रदान गरेर स्थानीय स्तरमै रोजगारी र आयआर्जनका अवसर सिर्जना गर्नेतर्फ प्रदेश सरकार लागिपरेको गुरुङको भनाइ छ ।
‘हामी अहिले पर्यटन नीति बनाउने क्रममा छौँ र यसका लागि नेचर (प्रकृति), एड्भेन्चर (साहसिक खेल), एग्रीकल्चर (कृषि), कल्चर (संस्कृति), हिस्ट्री (इतिहास), हेरिटेज (सम्पदा) एन्ड रिलिजन (धर्म) लाई मुख्य दृष्टिकोण मानेका छौँ,’ मन्त्री गुरुङले भने, ‘यिनै गतिविधि र गन्तव्यका रूपमा हामी गण्डकीलाई आधुनिक पर्यटनको जननीका रूपमा थप उजागर गर्ने गरी पर्यटन नीति बनाउन चाहन्छौँ ।’
सन् १९५० को दशकलाई नेपालको आधुनिक पर्यटन विकासको सुरुवातका रूपमा मानिने र सोही वर्ष गण्डकीमा रहेको अन्नपूर्ण प्रथम हिमाल सफलतापूर्वक आरोहण भएको गुरुङले उल्लेख गरे ।
‘यो घटना नेपालमा आधुनिक पर्यटनको पहिलो गतिविधि थियो, त्यसको तीन वर्षपछि मात्रै सगरमाथा आरोहण भयो,’ उनले भने, ‘यस हिसाबले आधुनिक पर्यटन विकासको जननी गण्डकी प्रदेश हो ।’
