काठमाडौँ — पाँच अन्तर्राष्ट्रिय एयरलाइन्सको उडानमा दीपक रौनियार निर्देशित फिल्म ‘राजागंज : पूजा सर’ हेर्न सकिने भएको छ । कतार, अमेरिकन, युनाइटेड, लुफ्थान्सा र स्वीस एयरलाइन्सबाट यात्रा गर्ने यात्रुले विमानभित्रै बसेर यो फिल्म हेर्न सक्नेछन् ।  

रौनियार निर्देेशित ‘हाइवे’ सन् २०१२ मा प्रतिष्ठित बर्लिन अन्तर्राष्ट्रिय फिल्म महोत्सवमा प्रिमियर भएको थियो । यो फिल्म नै विश्वका प्रमुख महोत्सवमा प्रिमियर हुने पहिलो नेपाली फिल्म हो । गत वर्ष विश्वकै पुरानो फिल्म महोत्सव भेनिसमा प्रिमियर भएको 'राजागंज' त्यसयता बुसान, टानिक ब्ल्याक नाइट्स, गोथेबर्ग, सोलोनिकी, सिड्नी, मुम्बईलगायत दर्जन बढी महोत्सव घुम्यो ।

नेपालबाट बाँसुरी फिल्मस् र नर्वेको ट्यानहाउजर गेटको सहकार्यमा आदि फिल्मस्‌ले निर्माण गरेको ‘राजागंज’मार्फत रौनियारले अन्तर्राष्ट्रिय एयरलाइन्सको ‘प्रोगामिङ’तर्फ फिल्मलाई पुर्‍याएर नेपाली फिल्मका लागि नयाँ बजार उघारिदिएका छन् । 

'कतारजस्तो विश्वकै नम्बर एक मानिएको एयरलाइन्स नेपालमा उड्छ, तर उनीहरुले त्यसमा नेपाली फिल्म प्रोगाम गर्दैनथे । हामीलाई आफ्नो सांस्कृतिक उपस्थितिको लागि भए पनि यो स्पेस हाम्रो फिल्ममा चाहिन्छ भन्ने लागेको हो । हाम्रै फिल्मबाट यो यात्रा सुरु हुँदा हामी गौरवान्वित छौं,' राजागंजका निर्माता नीरज श्रेष्ठ भन्छन्, 'यो हाम्रो कथाहरुको उडान मात्रै होइन । ३० हजार फिट उड्ने विश्व दर्शकबीच पुग्ने नेपाली फिल्महरुको यात्राकै सुरु हो ।' 

ग्लोबल इन-फ्लाइट इन्टरटेन्टमेन्ट कम्पनी पेनी ब्ल्याक मिडियाले ‘राजागंज’लाई अन्तर्राष्ट्रिय एयरलाइन्समा वितरण गरेको हो । यो कम्पनीले भेनिसमै फिल्मको इन-फ्लाइट वितरण अधिकार किनेको थियो । हलमा देखाउने अवधि सकिएलगत्तै दीपकको टोलीले फिल्मलाई एयरलाइन्स 'स्क्रिनिङ' सुरु गरेको हो । पेनी ब्ल्याकको कन्टेन्ट डिस्ट्रिब्युसनकी भीपी हुलिएटा एयरलाइन्स स्क्रिनिङको यो यात्रा प्रारम्भिक रहेको र अझै सम्झौता अगाडि बढाइरहेको बताउँछिन् । 'राजागंजलाई एयरलाइन्स चढ्ने विविध दर्शकलाई आकर्षित गर्न सक्ने फिल्म हो। यसको इन-फ्लाइट यात्रामा साथ दिन पाउँदा अत्यन्त गर्व महसुस गरिरहेको छु । फिल्मलाई अझ धेरै विश्वभरका इन-फ्लाइट स्क्रिनमा हेर्न आतुर छु, 'उनले भनिन् । 

जनकपुरमा खिचिएको ‘राजागंज’ सत्य घटनाबाट प्रेरित छ । क्राइम थ्रिलर जनराको यो फिल्म सामाजिक विषयवस्तुमा आधारित फिल्म हो । मधेश आन्दोलन चलिरहँदा अपहरित दुई बालकको खोज अनुसन्धानका लागि इन्सपेक्टर पूजा थापा(आशा मगराती)लाई काठमाडौंबाट खटाइन्छ । दुई बालकलाई खोजिरहँदा पूजाले त्यहाँभित्रको भेदभाव, लैंगिक विभेद र शक्तिको आडमा हुने राजनीतिको सामना गर्छिन् । उनले हालै अमेरिकाको स्यान डिएगोमा उत्कृष्ट अभिनेत्रीको अवार्ड जितिन् । मगरातीसँगै यो फिल्ममा निकिता चाण्डक, दयाहाङ राई, विजय बराल, रिचा शर्मा, आरती मण्डल, गौमाया गुरूङ, पशुपती राई, घनश्याम मिश्रा र निरज श्रेष्ठको अभिनय छ । 

यो फिल्म हालै फ्रान्सका ६२ स्क्रिनमा एकसाथ देखाइएको थियो । निर्देशक रौनियारका अनुसार फ्रान्समा १७ हजारभन्दा बढी दर्शकले यो फिल्म हेरेका थिए । यो फिल्म बेलायतको मुख्य टेलिभिजन 'च्यानल फोर'मासमेत प्रसारणमा आयो । नेदरल्यान्डमा 'फ्री टु बी मी अवार्ड' जितेको यो फिल्म प्रतिष्ठित विश्वविद्यालय हार्वर्ड, न्यूयोर्क, बोस्टनमा पनि देखाइएको छ । फिल्मले नेपाल प्रदर्शनमा भने सेन्सर झमेला सहनु परेको थियो । नर्वेको ह्वाइट र्‍याबिट र अमेरिकाको किनेमामा दुई फ्युचरिस्टिक प्लाटफर्मबाट यो फिल्म प्रदर्शन हुँदैछ । नेपाली दर्शकले यही डिजिटल प्लाटफर्ममार्फत फिल्म हेर्न पाउने निर्माता पूर्णसिंह बराइलीले बताए । 'हामी एउटा नयाँ एक्सपेरिमेन्ट गर्ने तयारीमा छौं । किनेमामार्फत संसारभरि दुई सयभन्दा बढी स्क्रिनिङ र कन्भर्सेसन गर्ने हाम्रो प्लान छ,'बराइलीले भने । 

यो फिल्मको लेखन दीपकसहित अभिनेत्री मगराती र डेभिड बार्करले गरेका हुन्। निर्देशक रौनियार, रामबाबु गुरूङ, आशा मगराती, एलन आर मिलिगन र निरज श्रेष्ठ निर्माता रहेको यो फिल्मका कार्यकारी निर्मातामा दयाहाङ राई, ग्याङ्स अफ वासेपुर निर्देशक अनुराग कश्यप, अस्कर नोमिनेटेड निर्माता जस्लिन बार्न्स र 'नेपाल अमेरिका फिल्म फेस्टिभल'का पूर्णसिंह बराईलीलगायत छन् ।