२७.१२°C काठमाडौं
काठमाडौंमा वायुको गुणस्तर: १७४

प्रभावशाली आलिया र देव

प्रतिष्ठित टाइम म्यागजिनले २०२४ का सय प्रभावशाली व्यक्तिहरूको सूची सार्वजनिक गरेको छ । सूचीमा कलाकारिता विधातर्फ अटाएका छन् आलिया भट्ट र देव पटेल ।

काठमाडौँ — बलिउड अभिनेत्री आलिया भट्ट बेलाबेलामा चर्चा र विवादमा आइरहन्छिन् । यस पटक भने उनी प्रतिष्ठित टाइम म्यागजिनका कारण चर्चामा आएकी हुन् । र, यसको कारण हो, म्यागजिनले सार्वजनिक गरेको प्रभावशाली एक सय व्यक्तिहरूको सूची । बिहीबार सार्वजनिक २०२४ का सबैभन्दा प्रभावशाली एक सय व्यक्तिको सूचीमा आलिया कलाकारिता विधामा अटाएकी हुन् ।

प्रभावशाली आलिया र देव

उनीसँगै बलिउड फिल्ममा आबद्ध कलाकार तथा निर्देशक देव पटेल पनि प्रभावशाली सय व्यक्तिको सूचीमा अटाएका छन् ।

म्यागजिनले आलिया ‘अद्भुत र निकै शक्तिशाली अभिनेत्री’ भएको उल्लेख गरेको छ । विश्वकै शीर्ष अभिनेत्रीमध्ये एक आलियाले एक दशकयता बलिउड फिल्म उद्योगमा पुर्‍याएको योगदान प्रशंसायोग्य भएको टाइमले उल्लेख गरेको छ । त्यसका साथै, आलिया व्यवसाय र परोपकारी कार्यमा पनि सक्रिय रहेकी म्यागजिनले उल्लेख गरेको छ । हलिउड निर्देशक, निर्माता तथा लेखक टम हार्परले आलिया निकै सरल र रमाइली भएको उल्लेख गरेका छन् । ‘आफ्नो कामबारे जान्ने उनको इच्छाशक्ति गजबको छ । काममा केन्द्रित र नयाँ विचारहरूका लागि खुला आलियामा रचनात्मक जोखिम लिन सक्ने क्षमता छ,’ हार्परले भनेका छन् ।

आलियाले गत वर्ष ‘हार्ट अफ स्टोन’ मार्फत हलिउडमा डेब्यु गरेकी थिइन् । हार्पर निर्देशित फिल्ममा आलियाले भिलेनको भूमिका निर्वाह गरेकी थिइन् । फिल्ममा गेल गेडोट र जोनी डर्नन मुख्य भूमिकामा थिए । ‘फिल्मको एक टेकमा उनका कारण आएको सुधार मेरा लागि एक अविस्मरणीय क्षण बन्यो,’ हार्परलाई उल्लेख गर्दै टाइमले उल्लेख गरेको छ ।

आफूमा रहेको स्टारडमलाई वास्तविकता र संवेदनशीलतासँग मिलाउने क्षमता नै आलियाको सुपरपावर भएको उनको भनाइ छ । ‘एक अभिनेत्रीका रूपमा उनी चम्किली छन् र एक व्यक्तिका रूपमा उनमा अन्तर्राष्ट्रिय स्टार बन्ने सन्तुलित सकारात्मक विश्वास र रचनात्मकता छ,’ हार्परले भनेका छन् ।

१९९३ मार्च १५ मा भट्ट परिवारमा जन्मिएकी आलियासँग बेलायती नागरिकता छ । उनका बुबा महेश भट्ट बलिउड फिल्म निर्माता तथा निर्देशक हुन् । आलियाका काका मुकेश भट्ट फिल्म निर्माता तथा कलाकार हुन् । आलियाले पाँच वर्षको उमेरमा १९९९ मा ‘संघर्ष’ फिल्ममा बाल कलाकारका रूपमा अभिनय गरेकी थिइन् । तनुजा चन्द्र निर्देशित फिल्मका निर्माता मुकेश हुन् । २००५ मा आलियाले सञ्जयलीला भन्सालीको फिल्म ‘ब्ल्याक’ का लागि अडिसन दिएकी थिइन्, तर कुनै भूमिका भने पाइनन् ।

२०१२ मा करण जोहरको फिल्म ‘स्टुडेन्ट अफ द इयर’ बाट भने आलिया बलिउडमा निकै चर्चित बनिन् । फिल्मको मुख्य अभिनेत्रीका लागि पाँच सय जनाले अडिसन दिएकामा उनी तौल घटाउने सर्तमा छानिइन् । फिल्मको सुटिङ सुरु हुनुअघि करिब तीन महिनाको अवधिमा आलियाले १६ केजी तौल घटाएकी थिइन् । त्यसपछि २०१४ मै उनले ‘हाई वे’, ‘टु स्टेट्स’, ‘हम्प्टी शर्माकी दुल्हनिया’, ‘अग्ली’ मा अभिनय गरिन् । अर्को वर्षमा ‘सानदार’ मा देखिएकी आलियाका २०१६ मा ‘कपुर एन्ड सन्स’, ‘उड्ता पञ्जाब’, ‘ए दिल हे मुस्किल’, ‘डियर जिन्दगी’ रिलिज भए ।

अर्को वर्ष ‘बद्रीनाथकी दुल्हनिया’ बनेकी आलियाका २०१८ मा दुई फिल्म आए, ‘राजी’ र ‘जिरो’ । २०१९ मा ‘गली ब्वाई’, ‘कलंक’, ‘स्टुडेन्ट अफ द इयर–२’, मा अभिनय गरेकी आलिया एक वर्षपछि भने ‘सडक–२’ मा मात्र देखिइन् । २०२२ मा ‘गंगुबाई कठियावाडी’ मा भने उनको अभिनयले तहल्का नै मच्चायो । हुसैन जैदीको किताब ‘माफिया क्वीन अफ मुम्बई’ को एक अध्यायमा आधारित फिल्मलाई सञ्जयलीला भन्सालीले निर्देशन गरेका हुन् । फिल्ममा आलिया मुम्बईको ‘रेड लाइट एरिया’ कमाठीपुराको शक्तिशाली, प्रेमिल र आदरणीय पात्रका रूपमा देखिएकी छन् ।

सन् १९६० को सेटिङमा खिचिएको फिल्ममा हिरोइन बन्ने सपना बोकेर सुटुक्क घर छाडेर कठियावाडीदेखि मुम्बई छिरेकी १६ वर्षीया युवती गंगाको कथा छ । तर रिलको हिरोइन बन्न नपाएकी उनी कमाठीपुराको बदनाम गल्लीमा आफ्नो शरीर बेचेर बाँचिरहेकाहरूका लागि भने ‘रियल हिरो’ बनिन् । ‘गंगुबाई कठियावाडी’मा गंगुबाईको मुख्य भूमिका दमदार रूपमा निभाएकी छन् आलियाले । हजार रुपैयाँका लागि प्रेमीबाट बेचिएकी गंगा पछि कसरी कमाठीपुराका करिब चार हजार यौनकर्मीको हकहितका लागि लडिन् र कमाठीपुराकै गंगुबाई बन्न सफल भइन् भन्ने देखाइएको छ फिल्ममा ।

कोठीमा जन्मेका बच्चाहरूलाई विद्यालय भर्ना गराउने सन्दर्भमा गरेको लडाइँमा र वेश्यावृत्तिलाई हेयको दृष्टिले हेर्ने समाजविरुद्ध गंगुबाईले दिएको भाषणमा निकै जमेकी छिन् आलिया । सोही वर्ष उनका अन्य तीन फिल्म ‘आरआरआर’, ‘डार्लिङ्स’ र ‘बम्हास्त्र’ आए । गत वर्षभने उनका ‘रक्की और रानी कि प्रेम कहानी’ र ‘हर्ट अफ स्टोन’ आए । उनको पछिल्लो फिल्म ‘जिग्रा’ सेप्टेम्बरमा रिलिज हुँदै छ । कतिपयले आलियालाई आफ्ना बुबा र काकासँग जोडेर बेलाबेलामा फिल्म निर्माता परिवारकी भन्दै आलोचना गर्ने गर्छन् । तर त्यस्तो आलोचनालाई उनले अभिनयमार्फत नै कडा जवाफ दिने गरेकी छन् ।

टाइमको प्रभावशाली सयको सूचीमा अटाएका अर्का कलाकार हुन् देव पटेल । १९९० अप्रिल २३ मा जन्मिएका देव बेलायती अभिनेता तथा फिल्ममेकर हुन् । उनले २००७ मा अनवर खर्रालको ‘स्किन्स’ नाटकबाट अभिनय यात्रा सुरु गरेका हुन् । डेभिड बोयल निर्देशित ‘स्लमडग मिलियनेर (२००८)’ बाट भने उनी निकै चर्चामा आए । फिल्मले २००९ मा उत्कृष्ट फिल्मको ओस्कार अवार्ड प्राप्त गरेको थियो । उत्कृष्ट फिल्मसँगै ‘स्लमडग मिलियनेयर’ ले निर्देशन, सम्पादन, ध्वनि सम्पादन, छायांकन लगायतका आठ विधामा अवार्ड हात पारेको थियो ।

भारतीय लेखक विकास स्वरूपले सन् २००५ मा लेखेको उपन्यास ‘क्यू एन्ड ए’ मा आधारित रहेर फिल्म निर्माण गरिएको हो । फिल्ममा भारतका झुपडपट्टीमा रहेका समस्याका साथै सांस्कृतिक र राष्ट्रिय मुद्दा उठान गरेको छ । निर्देशक बोयलले अनुराग काश्यपको ‘डीवाईके’ चलचित्रबाट प्रभावित भएर ‘स्लमडग मिलियनेयर’ बनाएको बताएका थिए । फिल्ममा देव पटेल र फ्रिडा पिन्टो मुख्य भूमिकामा छन् । उनीहरूसँगै अनिल कपुर, इरफान खान, मधुर मित्तललगायतको पनि फिल्ममा अभिनय देख्न सकिन्छ । ओस्कारका साथै फिल्मले बाफ्टा र गोल्डन गोल्ब्स अवार्डमा पनि उत्कृष्ट फिल्म र निर्देशकको अवार्ड प्राप्त गरेको थियो ।

‘स्लमडग मिलियनेर’ यता देवले थुप्रै फिल्ममा अभिनय गरेका छन् । उनले ‘द लास्ट एअरबेन्डर’, ‘द बेस्ट एक्जोटिक म्यारीगोल्ड होटल’, ‘अबाउट चेरी’, ‘द रोड विदिन’, ‘द म्यान हु न्यू इन्फिनिटी’, ‘वन्ली यस्टर्डे’, ‘लायन’, ‘होटल मुम्बई’ ‘द ग्रिन नाइट’ लगायतका फिल्म अभियन गरेका छन् । पछिल्लो पटक भने उनकै लेखन, निर्देशन र निर्माणमा ‘मंकी म्यान’ फिल्म आएको छ । यो उनको निर्देशकीय डेब्यु फिल्म हो । अस्कर विजेता निर्देशक डानियल कालुयाले आफूलाई ‘मंकी म्यान’ निकै मन परेको र ‘देव अविश्वसनीय निर्देशक’ भएको उल्लेख गरेका छन् । ‘देवसँग काम गर्ने एउटा गति छ । कुनै पनि कुरामा सीमित छैनन् र उनी निडर छन्,’ कालुयाले टाइममा लेखेका छन्, ‘देवसँग आफू अझै अघि बढ्ने र हामीलाई चकित पार्ने क्षमता छ । हेरौं उनले आगामी दिनमा के गर्छन् ।’ देवको ‘र्‍याबिट ट्र्याप’ अर्को वर्ष रिलिज हुँदै छ ।

कलाकारितातर्फ अमेरिकी गायिका दुआ लिपा पनि टाइमको सय प्रभावशाली व्यक्तिको सूचीमा छन् । उनी तीन पटक ग्रामी अवार्ड जितेकी गायिका हुन् । टाइमले कलाकारिता, आइकन, टाइटन, नेतृत्व, आविष्कारक र विभिन्न विधाका अगुवा लगायतलाई समेटेर २०२४ का प्रभावशाली १०० व्यक्तिको सूची सार्वजनिक गरेको हो ।

प्रकाशित : वैशाख ७, २०८१ ०७:०८
प्रतिक्रिया
पठाउनुहोस्
जनताको राय

सरकारले ल्याएको आर्थिक वर्ष २०८१/०८२ को बजेट कस्तो लाग्यो ?