काठमाडौँ — 'आदिपुरुष'का संवाद लेखक मनोज मुंतशिरले नेपालबारे विवादास्पद अभिव्यक्ति दिएका छन् । नेपालको स्वाधिनताबारे एक सञ्चारमाध्यमबारे उनले विवादास्पद अभिव्यक्ति दिएका हुन् ।

शनिबार लल्लनटपसँगको अन्तर्वार्तामा मुंतशिरले नेपाल पहिले भारतकै अंश थियो भनेर झूट बोलेका हुन् ।

'आदिपुरुष' को संवादलाई लिएर विवाद चर्किएपछि नेपालमा त्यसको केही संवाद काटेर रिलिज गरिएको हो । 'नेपालको विरोध मैले बुझ्न सकेको छैन । नेपाल भारतको अंश हुँदाको कहानी हो यो । यदि सीतालाई हामी भारतकी छोरी भन्दैछौं भने नेपाल कहाँ भारतबाट अलग्गिइसकेको थियो र ? १९०३ या १९०४ तिर नेपाल भारतबाट अलग्गिएको थियो,'मुतंशिरले भनेका छन्,'नेपाल भारतमै थियो । सीता भारतकै छोरी थिइन् । यदि नेपालीहरूलाई कुनै किसिमको चित्तदुखाइ छ र मसँग उनीहरूको कुरा हुन पायो भने जतिबेलाको यो कथा हो त्यो समयमा जानकी भारतकै छोरी थियो भनेर म सम्झाउनेछु ।'