आजकै दिन : नोरा जोन्सको जन्म
काठमाडौँ — अमेरिकी गायिका, गीतकार र पियानो वादक नोरा जोन्सको सन् १९७९ मा आजकै दिन (मार्च ३०) मा जन्म भएको थियो । उनको पूरा नाम गीताली नोरा जोन्स शंकर हो ।
उनको पिता भारतीय संगीतकार रवि शंकर र आमा अमेरिकी कन्सर्ट प्रोड्युसर सुई जोन्स हुन् । नोराको जन्म न्युयोर्कमा भएको थियो । उनले दर्जनौं सांगीतिक अवार्ड प्राप्त गरिसकेकी छन् । संगीत तथा मनोरञ्जनसम्बन्धी अमेरिकी म्यागजिन बिलबोर्डले उनलाई २००० को दशकको शीर्ष ज्याज कलाकार घोषित गरेको थियो । उनले हालसम्म नौ वटा ग्रामी अवार्ड जित्न सफल भएकी छन् ।
नोराले सन् २००२ मा एकल एल्बम ‘कम अवे विथ मि’ सार्वजनिक गरेकी थिइन्, जसको २ करोड ७० लाख प्रति बिकेको थियो । उक्त गीतमार्फत उनले ‘एल्बम अफ द इयर’, ‘रेकर्ड अफ द इयर’, ‘बेस्ट न्यु आर्टिस्ट’ जस्ता विधामा ५ वटा ग्रामी अवार्ड प्राप्त गरेकी थिइन् । उनले त्यसपछि ‘फिल्स अफ लाइक होम २००४)’, ‘नट टु लेट (२००७)’, ‘द फल (२००९)’ जस्ता एल्बम ल्याएकी छन्, जसको लाखौं प्रति बिक्री भएको छ ।
उनले पछिल्लो समय ‘पिक मी अप अफ द फ्लोर (२०२०)’ एल्बम सार्वजनिक भएको छ । उनले कलाकारका रूपमा ‘माई ब्लुबेरी नाइट्स’ फिल्ममा अभिनय गरेकी छन्, जुन फिल्म सन् २००७ मा प्रदर्शनमा आएको थियो ।
