हेटौंडा — आसन्न प्रतिनिधिसभा सदस्य निर्वाचनका लागि मकवानपुरमा २४ जना उम्मेदवारले छुट्टै बैंक खाता खोलेका छन् ।

प्रदेश निर्वाचन कार्यालयका अनुसार उम्मेदवारी दिएका ४४ उम्मेदवारमध्ये बुधबारसम्म २४ जनाले निर्वाचन प्रयोजनार्थ नयाँ बैंक खाता खोलेका हुन् ।

बैंकको खाता खोल्न प्रदेश निर्वाचन कार्यालयवाट सिफारिस लगेका २४ जना उम्मेदवारले खाता खोलेको जानकारी आएको प्रदेश निर्वाचन कार्यालय हेटौंडाका सूचना अधिकारी ताराप्रसाद आचार्यले बताए । ‘बाँकी २० उम्मेदवारले बैंक खाता खोल्न सिफारिससमेत लिन आएका छैनन्,’ उनले भने । मकवानपुरमा राजनीतिक दलबाट उम्मेदवारी दिएका ९ जना र स्वतन्त्र उम्मेदवारी दिएका ११ जनाले निर्वाचन प्रयोजनार्थ बैंकमा खाता खोल्न सिफारिस समेत नलगेको उनको भनाइ छ । 

निर्वाचन आचारसंहिताअनुसार कुनै पनि उम्मेदवारले निर्वाचनमा हुने खर्च तथा प्राप्त सहयोग रकम बैंकिङ प्रणालीबाट मात्रै गर्नुपर्छ । २५ हजारभन्दा बढीको सहयोग तथा खर्च बैंकबाटै र त्यसभन्दा कम नगद लेनदेन गरे पनि रसिद भने दाखिला गर्नुपर्ने हुन्छ ।

२ निर्वाचन क्षेत्र रहेको मकवानपुरमा ४४ जनाले उम्मेदवारी दिएका छन् । मकवानपुर–१ मा २१ र २ मा २३ जनाले उम्मेदवारी दिएका छन् । उम्मेदवारहरूले निर्वाचन प्रयोजनका लागि जुनसुकै बैंक छुट्टै खाता खोल्नुपर्ने हुन्छ । त्यसका लागि निर्वाचन कार्यालयले सिफारिसपत्र दिने गरेको छ । उम्मेदवारले निर्वाचन प्रयोजनार्थ बैंक खाता खोलेपछि उक्त वित्तिय संस्थाले निर्वाचन कार्यालयलाई जानकारी दिने गर्छ ।