काभ्रे — बीपी राजमार्ग अवरुद्ध भएपछि काभ्रेको रोशीमा अलपत्र परेका यात्रुलाई राहत खाद्यान्न बोकेर गएको हेलिकप्टर अवतरण हुन नसकेपछि फर्किएको छ । जिल्ला विपद व्यवस्थापन समितिको सहयोगमा राजमार्गमा शुक्रबारदेखि अलपत्र परेका यात्रुहरूलाई खाद्यान्न बोकेर नेपाली सेनाको हेलिकप्टर शनिबार साँझ ६ः०० बजे धुलिखेलबाट उडेको थियाे ।
तर राेशी क्षेत्रमा अवतरण गर्न नसकेपछि हेलिकप्टर धुलिखेल फर्किएको जिल्लास्थित कालीजंग गणका गणपति प्रमुख सेनानी प्रकाशबहादुर सिंले बताए । उनका अनुसार मौसम प्रतिकूलताका कारण हेलिकप्टर ल्यान्ड गर्न नसकेको हो ।
हेलिकप्टर अवतरण हुन नसकेपनि राजमार्गस्थित रोशी गाउँपालिकाका विभिन्न स्थानमा अलपत्र यात्रुको सहयोगका लागी प्रयास भइरहेको गाउँपालिकाका अध्यक्ष दिनेश लामाले जानकारी दिए । उनका अनुसार रोशी गाउँपालिकास्थित शान्ति बुद्ध प्राथमिक विद्यालयमा करिब १५० जना, पिंथलीबेंसीमा ९० र नार्केमा ५० यात्रु शुक्रबारदेखि अलपत्र अवस्थामा छन् । गाउँपालिकाले अलपत्रमा परेका केही यात्रुहलाई खाद्यन्न सहयोग गरेको उनले बताए ।
