मकवानपुर — हेटौंडा उपमहानगरपालिकाको विभिन्न वडाहरुमा राहतको नाममा खाद्य सामग्रीको सट्टा नगद रकम वितरण भइरहेको छ ।

लकडाउनको समयमा सकारले दैनिक ज्यालादारी, मजदुर र खाद्य सामग्रीको अभाव भएकाहरुलाई एकद्वार प्रणालीमार्फत् राहत वितरण गर्न दिएको निर्देशन विपरित अन्तर्राष्ट्रिय गैरसरकारी संस्था प्लान नेपालमार्फत् राडो नेपालले हेटौंडाको आधा दर्जन वडामा राहतको नाममा नगद वितरणको क्रमलाई जारी राखेको छ ।

हेटौंडा–३, १२, १३, १४, १५ र १९ नम्बर वडाका तीनहजार घरधुरीलाई नगद दुईहजार सातसय ३० रुपैयाँको दरले राडो नेपालले राहत रकम वितरण गरिरहेको छ । ‘हामीले हेटौंडा उपमहानगरपालिकासँग समन्वय गरेर राहत वितरण गरेका हौं,’ राडो नेपालका प्रतिनिधि कृष्ण धितालले टोल विकासको सिफारिसमा वडाले तयार पारेको नामावली अनुसार आफूहरुले नगद प्रदान गरेको दाबी गरे ।

संघीय सरकारले तयार पारेको राहतको मूल्य बराबरको नगद आफूहरुले प्रदान गरिरहेको धितालले बताए । उनका अनुसार प्लानले समाज कल्याण परिषद्ले तोके अनुसार खाद्यान्न वा नगद दुवै वितरण गर्न सक्ने जनाएअनुसार नगद प्रदान गरिएको हो ।

यता, हेटौंडा उपमहानगरपालिकाले भने आफूहरुले राहत कोषमा रकम जम्मा गर्न आग्रह गर्दा समेत राडो नेपालले आफूहरुको नीति नभएको बताएपछि रकम वितरण गर्न दिइएको जनाएको छ । एनजीओले हेटौंडामा राहत वितरण गर्न नपाएको खण्डमा कालिकोटमा लगेर वितरण गर्छौ भनेपछि नगदै वितरण गर्न दिइएको मेयर हरिबोल महतले बताए ।