काठमाडौँ — कक्रोच जनता पार्टी(सीजेपी) लाई इन्स्टाग्राममा सत्तारुढ भारतीय जनता पार्टी(भाजपा)लाई भन्दा धेरैले फलो गरेका छन् । यो समाचार तयार पार्दासम्म सीजेपीलाई करिब १ करोड ३० लाखले फलो गरेका छन् । भाजपाको एकाउन्टमा भने ८८ लाख फलोअर रहेका छन् । कक्रोच जनता पार्टीका नाममा वेबसाइट पनि खोलिएको छ । पार्टी खोलिएको ५ दिन मात्र भएको छ । 

वेबसाइटमा दिइएको जानकारीअनुसार ७२ घण्टामै पार्टीका १ लाखभन्दा बढीले सदस्यता लिएका छन् । त्यस्तै २ जना लोकसभा सदस्य पनि पार्टीको बोर्डमा रहेको जानकारी दिइएको छ । तृणमूल कांग्रेसका सांसदद्वय महुआ मोइत्रा र कीर्ति आजादले पार्टीलाई समर्थन गरेको बताएका थिए । सीजेपीको वेबसाइटमा पनि सांसदद्वयले सीजेपीको सदस्यता सार्वजनिक रूपमै स्वीकार गरेको उल्लेख छ ।  

महुआ मोइत्राले सीजेपीको पोस्ट सेयर गर्दै उनी पनि 'एन्टी-नेसनल पार्टी' को सदस्य बन्न चाहेको बताएकी थिइन् । साथै कीर्ति आजादले पनि पार्टीमा सहभागी हुन के-के योग्यता चाहिन्छ भनेर सोधेका थिए । यसमा सीजेपीले पनि जवाफ दिएको छ कि, '१९८३ को विश्वकप जित्नु नै काफी छ ।' भारतले १९८३ को विश्वकप जित्दा कपिलदेवको कप्तानीमा कीर्ति आजाद पनि टिम सदस्य रहेका थिए । 

भारतमा तहल्का मच्चाइरहेको 'कक्रोच जनता पार्टी' के हो ?

यतिबेला 'मैं भी ककरोच' अर्थात 'म पनि कक्रोच' अभियान चलाइएको छ । सीजेपीले आफूलाई अल्छी र बेरोजगारहरूको आवाजका रूपमा प्रस्तुत गरेको छ । 

भारतीय प्रधानन्यायाधीश सूर्यकान्तले युवाहरूलाई अल्छी र कक्रोच भनेपछि प्रतिकात्मक रूपमा अभियानको नाम राखिएको हो । 

सीजेपीले यसलाई युवाका लागि 'युवाहरूद्वारा बनाइएको युवाहरूको राजनीतिक मञ्च' का रूपमा दाबी गरेको छ । केही दिनमा यस अभियानमा लाखौँ युवाहरू जोडिएका छन् । यस पार्टीका संस्थापक बोस्टन विश्वविद्यालयमा जनसम्पर्क पढिरहेका ३० वर्षीय विद्यार्थी अभिजीत दिपके हुन् । 

उनी सन् २०२० देखि २०२३ सम्म आम आदमी पार्टी(आप) को सोसल मिडिया टिममा स्वयंसेवीका रूपमा कार्यरत थिए ।  

सीजेपीले आफूलाई 'वर्तमान व्यवस्थाबाट निराश मानिसहरूको आवाज' भएको दाबी गरेको छ । 

त्यसो त पार्टीको नामलाई लिएर पनि विभिन्न टीकाटिप्पणी भइरहेका छन् । कतिपयले भारतीय प्रधानन्यायाधीश सूर्यकान्तको कथित अभिव्यक्तिमा आधारित रहेको पनि बताएका छन् । सूर्यकान्तले युवालक्षित यस्तै अभिव्यक्ति दिएका थिए ।  सूर्यकान्तले भनेका थिए, 'केही युवा कक्रोचजस्तै हुन्छ । जो जागिर पाउँदैनन्, उनीहरू मिडिया, सोसल मिडिया वा आरटीआई अभियन्ता बनेर सिस्टममाथि आक्रमण गर्छन् ।' पछि उनले आफ्नो भनाइ तोडमोड गरेर प्रस्तुत गरिएको समेत दाबी गरे ।

तर सीजेपीका संस्थापक अभिजीत दिपकेले यसलाई रमाइलो पारामै जवाफ फर्काएका छन् । उनले भनेका छन्, 'कक्रोच जनता पार्टीको संस्थापक भएको नाताले म यस स्पष्टीकरणको निन्दा गर्छु ।' सीजेपीले एआई-जेनेरेटेड एन्थम पनि जारी गरेको छ । जहाँ भनिएको छ, 'वि आर कक्रोच पार्टी, वि आर चिल्ड्रेन अफ अ बर्निङ सिटी ।' सीजेपीले भर्चुअल रूपमै पहिलो जेन-जी सम्मेलन गर्ने पनि बताएको छ । 

पछिल्लो समय भारतीय राजनीतिलाई तरंगित बनाइरहेको राष्ट्रिय योग्यता र प्रवेश परीक्षा( नीट) र सीबीएसईजस्ता परीक्षामा भएको पेपरलिक र गडबडीका बारेमा पनि सीजेपीले आवाज उठाएको छ । 

सीजेपीको पाँचबुँदे घोषणापत्र पनि सार्वजनिक भएको छ । सीजेपीको माग छ कि अवकाशपछि कुनै पनि प्रधानन्यायाधीशलाई राज्यसभा सिट दिइने छैन । भारतका ४६औं प्रधानन्यायाधीश रञ्जन गोगोई अवकाशको केही समयमै राज्यसभा सांसद बनेका थिए । १७ नोभेम्बर २०१९ मा प्रधानन्यायाधीशबाट अवकाश पाएका उनी १७ मार्च २०२० मै राज्यसभा सांसद बनेका थिए ।

त्यस्तै सीजेपीको अर्को घोषणा छ- यदि कुनै पनि वैध मतदातालाई मतदाता सूचीबाट हटाइए प्रमुख निर्वाचन आयुक्तमाथि यूएपीएक कानुनअन्तर्गत कारबाही हुनुपर्छ । संसद् र क्याबिनेटमा महिलालाई ५० प्रतिशत आरक्षण र प्रेस स्वतन्त्रताको ग्यारेन्टी पनि सीजेपीको घोषणापत्रमा उल्लेख छ । त्यस्तै दल बदल्ने सांसद र विधायकलाई २० वर्ष चुनाव लड्न नदिने व्यवस्था ल्याउने पनि उसको घोषणा छ ।