काठमाडौँ — भेनेजुएलाले नर्वेस्थित आफ्नो दूतावास बन्द गर्ने घोषणा गरेको छ । भेनेजुएलाकी विपक्षी नेतृ मारिया कोरिना माचादो नोबेल शान्ति पुरस्कार विजेता घोषित भएलगत्तै भेनेजुएलाले यस्तो निर्णय गरेको हो ।

नर्वेको परराष्ट्र मन्त्रालयका एक प्रवक्ताले रोयटर्स समाचार एजेन्सीलाई बताएअनुसार भेनेजुएलाले दूतावास बन्द गर्नुको कारण भने खुलाएको छैन । अलजजिरामा प्रकाशित समाचारअनुसार नर्वेको परराष्ट्र मन्त्रालयले नोबेल समिति नर्वे सरकारको नभई स्वतन्त्र संस्था भएको बताएको छ ।

जनताको अधिकार स्थापनाका निम्ति तानाशाही व्यवस्थासँग निरन्तर लडिरहेको भन्दै नोबेल शान्ति पुरस्कार प्रदान गर्ने समितिले माचादोलाई पुरस्कृत गरेको हो । समितिले 'निष्पट्ट अँध्यारोमा पनि लोकतन्त्रको ज्योति जोगाउने काम गरेका कारण' नोबेल शान्ति पुरस्कार प्रदान गरेको बताएको छ ।

माचादोलाई गत वर्ष भएको निर्वाचनमा उम्मेदवार बन्नबाट रोकिएको थियो । त्यसपछि उनले विपक्षी दलका उम्मेदवार एडमुन्डो गोन्जोलेस युरुटियालाई समर्थन गरेकी थिइन् । जुन निर्वाचन राष्ट्रपति निकोलास मादुरोले जितेपनि उक्त निर्वाचनको निष्पक्षतामाथी शंका उठ्दै आएको छ । 

भेनेजुएलाले नर्वेका अतिरिक्त अस्ट्रेलियामा रहेको आफ्नो दूतावास पनि बन्द गर्ने निर्णय गरेको छ । भेनेजुएलाले बुर्किना फासो र जिम्बाबेमा दुई नयाँ दूतावास खोल्ने योजना बनाएको छ।