काठमाडौँ — गत डिसेम्बरमा चीनको वुहानबाट सुरु भएको कोरोना (कोभिड–१९) संक्रमण अहिले विश्वका १६० भन्दा बढी देशमा फैलिइसकेको छ । मंगलबार दिउँसोसम्म कोभिड–१९ को संक्रमणबाट ७ हजार एक सय ७५ को मृत्यु भएको छ । त्यस्तै एक लाख ८३ हजारभन्दा बढी संक्रमित भएका छन् भने करिब ७९ हजार निको भएको विश्व स्वास्थ्य संगठन(डब्लूएचओ) ले जनाएको छ । 

पछिल्लो समय चीनमा भन्दा अमेरिका र युरोपका देशहरुमा कोभिड–१९ को संक्रमण बढिरहेको छ । सोमबार मात्रै इटालीमा ३४९ जनाको मृत्यु भएको छ । मंगलबार दिउँसोसम्म इटालीमा कोभिड–१९ को संक्रमणबाट २ हजार एक सय ५८ जनाको मृत्यु भएको छ  भने २७ हजार ९ सय ८० भन्दा बढी संक्रमित भएका छन् । त्यस्तै इरानमा ८ सय ५३ जनाको मृत्यु भएको छ भने करिब १५ हजार संक्रमित भएका छन् । 

त्यस्तै स्पेनमा मंगलबार दिउँसोसम्म ३४२ को मृत्यु भएको छ भने करिब १० हजार संक्रमित भएका छन् । सोमबार चीनमा भने १३ जनाको मात्रै मृत्यु भएको छ भने २१ जनामा संक्रमण देखिएको छ । चीनमा मंगलबार दिउँसोसम्म ३ हजार २ सय २६ जनाको मृत्यु भएको छ । त्यस्तै चीनमा अहिलेसम्म ८० हजारभन्दा बढी संक्रमित भएका छन् भने ६८ हजारभन्दा निको भइसकेका छन् । चीनबाहिर मात्रै अहिलेसम्म ३ हजार ८ सय ९४ जनाको मृत्यु भएको छ । 

कोरोनाका लागि हलिउड जोडीको सहयोग

ऱ्यान रेनोल्ड्स र ब्लेक लाइभ्लीले कोरोनाका लागि एक मिलियन (दश लाख)अमेरिकी डलर सहयोग गर्ने भएका छन् । कोरोना प्रकोपका कारण उपचार गराउन नसक्ने अमेरिकी तथा क्यानडेली परिवारका लागि उनीहरुले उक्त रकम सहयोग गर्ने भएका हुन् ।