विश्व स्वास्थ्य संगठनद्वारा संयम रहन आग्रह
बेइजिङ — कोरोना भाइरसलाई लिएर संयम रहन विश्व स्वास्थ्य संगठनले मंगलबार सबै देशलाई आग्रह गरेको छ । भाइरस संक्रमणका अधिकांश पीडितमा मध्यम खालको असर देखिरहेको भन्दै उसले संयम रहन भनेको हो ।
भाइरसका कारण मृत्यु हुनेको संख्यामा मंगलबार पुनः वृद्धि भएपछि चीनले जारी गरेको एउटा प्रतिवेदन उद्धृत गर्दै विश्व स्वास्थ्य संगठनले प्रकोप नियन्त्रणका नाममा भइरहेका अधिकतम गतिविधिप्रति पनि चासो व्यक्त गरेको छ । सार्स र मेर्सजस्ता भाइरसभन्दा कोरोना भाइरस कम प्राणघातक रहेको पनि उसले जनाएको छ ।
चीनका स्वास्थ्य अधिकारीले पहिलो पटक मंगलबार जारी गरेको प्रतिवेदनमा कोरोना भाइरस संक्रमितमा मध्यम खालको असर देखिन थालेको जनाइएको छ । चीनको रोग नियन्त्रण तथा रोकथाम केन्द्रले जारी गरेको तथ्यांकअनुसार ८० प्रतिशतभन्दा बढी संक्रमण नरम खालका छन् । संक्रमण पुष्टि भएका ७२ हजारभन्दा बढी संक्रमितमा भएका अध्ययनमा ८१ प्रतिशत बिरामीमा साधारण संक्रमण देखिएको उसले जनाएको छ । भाइरस जोखिममा सबैभन्दा धेरै बूढापाका र बिरामी रहेको केन्द्रको प्रतिवदेनमा उल्लेख छ ।
संक्रमितमध्ये मृत्यु हुनेको दर २.३ प्रतिशत रहेका र ३० देखि ४० वर्षभित्रका मानिसको मृत्युदर एक प्रतिशतभन्दा कम रहेको अध्ययनमा भनिएको छ । असल साथ, राम्रो उपचार र पौष्टिक आहार प्राप्त भयो भने ८५ प्रतिशत संक्रमितको स्वास्थ्यमा सुधार आउने चिनियाँ राष्ट्रिय स्वास्थ्य आयोगका एक प्रख्यात विज्ञ झोङ नान्सानले सञ्चारकर्मीसँग बताए ।
प्रकाशित : फाल्गुन ६, २०७६ २१:४९