मन्त्रालयले राखेपलाई पत्र पठाएर क्यानमाथिको कारबाहीसम्बन्धी स्पष्टीकरण मागेको हो ।
काठमाडौँ — नेपाल क्रिकेट संघ (क्यान) विरुद्ध अख्तियार दुरुपयोग अनुसन्धान आयोगमा परेका उजुरीमाथि कारबाही अगाडि नबढाएको भन्दै युवा तथा खेलकुद मन्त्रालयले राष्ट्रिय खेलकुद परिषद् (राखेप) लाई चेतावनीसहित पत्र पठाएको छ ।
मन्त्रालयले राखेपलाई पत्र पठाएर क्यानमाथिको कारबाहीसम्बन्धी स्पष्टीकरण मागेको हो । मन्त्रालयले राखेपलाई २३ वैशाखमा पठाएको पत्रअनुसार अख्तियारमा क्यानबारे परेको उजुरी र आन्त्रिक अनुसन्धान गर्न अख्तियारले दिएको निर्देशन बेवास्ता गरेकामा राखेपसँग जवाफ मागिएको हो ।
मन्त्रालयले पठाएको पत्रमा अख्तियारले २०८१/०८/१६ र २०८१/११/२१ मा पठाएको पत्रअनुसार कारबाही र निलम्बन गर्नुपर्नेमा त्यसो नभएकामा राखेपलाई चेतावनी दिइएको छ ।
मन्त्रालयले ऐनको दफा २९ बमोजिम किन कारबाही नगर्ने भनी क्यानसँग स्पष्टीकरण माग गरी आवश्यक कागजातसहित जवाफ पेस गर्न राखेपमार्फत निर्देशन पनि दिइएको छ । मन्त्रालयले यो अन्तिम चेतावनी भन्दै कारबाही अघि बढाउन पनि निर्देशन दिएको छ ।
नेपाल प्रिमियर लिग (एनपीएल) को पहिलो संस्करणमा बिनाटेन्डर कार्य गरेको लगायत प्रक्रियागत त्रुटि गरेको भनी तत्कालीन राखेप बोर्ड सदस्य रञ्जना प्रधानको नेतृत्वमा बनेको छानबिन समितिले निर्क्योल गरेको थियो । साथै सो छानबिनका क्रममा क्यानले कागजात उपलब्ध नगराएको भनी आरोप लगाएको थियो ।
